Pas gjashtë vitesh hetime dhe procese gjyqësore në SPAK dhe gjykatat e posaçme, Gjykata e Lartë rrëzoi vendimet që kishin shpallur fajtor ish-anëtarin e Kolegjit të Posaçëm të Apelimit, Ardian Hajdari, për fshehje të ardhurash dhe pasurie, duke pushuar përfundimisht çështjen ndaj tij.
Hajdari ishte dënuar fillimisht nga Gjykata e Posaçme e Shkallës së Parë me një vit burg, të konvertuar në dy vite shërbim prove, ndërsa Apeli i Posaçëm e la në fuqi fajësinë, por e uli dënimin në gjashtë muaj burgim, të pezulluar me një vit shërbim prove.
Megjithatë, Gjykata e Lartë vendosi më 21 maj të prishë të dy vendimet dhe të pushojë çështjen pa e kthyer për rigjykim, bazuar në nenet 441 dhe 442 të Kodit të Procedurës Penale.
Sipas nenit 442, Gjykata e Lartë mund të pushojë çështjen kur fakti nuk përbën vepër penale, vepra është shuar ose ndjekja penale nuk duhet të kishte nisur apo vazhduar.
Çështja ndaj Hajdarit nisi pas një kallëzimi penal të bërë në SPAK në qershor 2020, ku pretendohej se ai kishte falsifikuar dokumente dhe kishte gënjyer në aplikimin për t’u zgjedhur anëtar i KPA-së, duke deklaruar se kishte ushtruar profesionin e avokatit për 17 vjet. Në përfundim të hetimeve, SPAK e akuzoi atë për mosdeklarim të të ardhurave nga avokatia, duke argumentuar se bëhej fjalë për fshehje të qëllimshme dhe jo harresë.
Për shkak të procesit penal, Hajdari u pezullua nga detyra në KPA rreth katër vite e gjysmë më parë. Vendimi i fundit i Gjykatës së Lartë i hap rrugën rikthimit të tij në sistemin e drejtësisë.
Në një reagim për BIRN, Hajdari tha se vendimi ishte i vonuar, por se drejtësia nuk iu mohua.
“Kam pasur besimin dhe durimin e duhur për të pritur fjalën e fundit të Gjykatës,” shkroi ai, duke shtuar se do të presë zbardhjen e vendimit të arsyetuar për të vlerësuar hapat e mëtejshëm.
