I pyetur nga BIRN nëse ishte hequr sanksionimi për kreun e Partisë Demokratike, Sali Berisha dhe mbi ç’bazë, një zëdhënës i Departamentit të Shtetit deklaroi se: “Departamenti i Shtetit ka vendosur përjashtime për disa persona të sanksionuar mbi bazën e seksionit 7031(c) nga administrata e kaluar, pasi heqja e sanksioneve i shërben një interesi bindës kombëtar”.
Kreu i opozitës, Sali Berisha u tha gazetarëve më herët të enjten se Shtetet e Bashkuara të Amerikës e kishin njoftuar zyrtarisht për heqjen e sanksionit të njohur gjerësisht si ‘non grata”, pesë vite pas shpalljes së saj nga administrata e ish-presidentit Joe Biden me motivacionin e përfshirjes në “korrupsion madhor”.
“U ktheva!” iu drejtua Berisha mediave para Parlamentit, duke shtuar se “gjersa jam këtu, kam patur komunikim zyrtar”.
Berisha pretendoi gjithashtu se nuk kishte qëne asnjëherë ‘non grata’, por kishte pasur vetëm një sanksion vize.
Në vitin 2021, pak muaj pas përfundimit të zgjedhjeve parlamentare, Berisha në atë kohë deputet i PD u shpall ‘non grata” nëpërmjet një njoftimi për shtyp të ish- sekretarit të Shtetit, Antony Blinken.
“Sot unë po shpall publikisht Sali Berishën, ish-President i Shqipërisë, ish-kryeministër dhe ish-anëtar i Parlamentit për shkak të përfshirjes së tij në korrupsion madhor,” thuhej në njoftimin e Blinken.
Bashkë me Berishën u dizenjuan si të tillë edhe bashkëshortja, Liri Berisha, i biri, Shkëlzen Berisha dhe vajza e tij, Argita Berisha Malltezi. Masa parashikonte sanksione që ndalonin personat e shpallur ‘non grata’ që të udhëtonin në Shtetet e Bashkuara.
Berisha e sulmoi vendimin si të lobuar dhe pretendoi se kishte ngritur padi ndaj Sekretarit Amerikan të Shtetit, Antony J. Blinken në një gjykatë në Francë.
