Prokuroria e Posaçme njoftoi të martën më 16 qershor përfundimin e hetimeve dhe dërgimin për gjykim të një çështjeje penale në ngarkim të 10 të pandehurve të akuzuar për trafikimin e tonelatave kokainë nga vendet e Amerikës Latine drejt Evropës, si dhe për kontrabandim të qenieve njerëzore. Të pandehurit Musa Gjikola, Jani alias Ilir Meçja, Sokol Masha, Akil Alushi, Ledri Lulashi, Arian Gjata, Selami Lushkaj, Klodjan Muça, Denis Harusha dhe Lorenzo alias Arbër Çadri alias Hysko alias Isufi alias Çela, akuzohen për trafikim të lëndëve narkotike dhe grup të strukturuar criminal. Masha dhe Alushi janë marrë të pandehur edhe për veprën penale “ndihmë për kalim të paligjshëm të kufijve”, duke kontrabanduar shtetas Sirianë.
Sipas SPAK, në hetimin e këtij procedimi penal kanë bashkëpunuar autoritetet e drejtësisë braziliane, ekuadoriane, franceze, holandeze, italiane dhe serbe. Nga hetimet ka rezultuar se të pandehurit, në bashkëpunim me disa persona të dënuar nga autoritetet e huaja dhe me disa persona të paidentifikuar ende, kanë trafikuar sasi të konsiderueshme të lëndësh narkotike nga vendet e Amerikës Latine, nga Shqipëria drejt vendeve të Bashkimit Europian, si dhe kanë ndihmuar kalimin e paligjshëm të kufirit, nga Shqipëria për në Itali të 55 shtetasve sirianë.
Për të realizuar veprimatrinë e tyre të paligjshme, të pandehurit kanë komunikuar përmes platformave të enkriptuara “SkyEcc”, që janë administruar nga autoritetet e drejtësisë franceze. SPAK konstaton se grupi kriminal drejtohej dhe financohej nga të pandehurit Musa Gjikola, Jani alias Ilir Meçja, Selami Lushka, Klodjan Muça, Denis Harusha dhe Lorenzo alias Arbër Çadri alias Hysko alias Isufi alias Çela. Ndërkohë, të pandehurit, Sokol Masha, Akil Alushi, Ledri Lulashi dhe Arian Gjata, vlerësohet se kanë qenë anëtarë të grupit.
Gjatë kontrolleve të ushtruara në tetë episode të trafikimit të lëndëve narkotike gjatë viteve 2020-2021 janë, është provuar trafikimi i lëndëve narkotike nga Brazili dhe Ekuadori drejt porteve kryesore të Italisë dhe Holandës, si dhe nga Shqipëria drejt Greqisë dhe Gjermanisë. Në total janë trafikuar 4340 kg lëndë narkotike, nga të cilat 3635 kg kokainë, 2 kg heroinë dhe 701 kg canabis sativa.
SPAK njofton se ka ndarë procedimin penal për të identifikuar bashkëpunëtorë të tjerë të të pandehurve, që dyshohet se kanë marrë pjesë në këto episode të trafikimit të lëndëve narkotike.
