Gjykata e Posaçme rrëzoi të martën kërkesën e Ajola Xoxës për pezullimin me dy muaj të gjykimit të çështjes, ku ajo së bashku me bashkëshortin Erion Veliaj akuzohen nga Prokuroria për korrupsion dhe pastrim parash.
Kryesuesja e trupit gjykues, Elsa Ulliri konstatoi se e pandehura Xoxa kishte depozituar kërkesë për shtyrje të seancës, duke bashkëngjitur dhe raportin mjekësor për lindjen e fëmijës me 63 ditë.
Avokati e Xoxës, Gurali Brahimllari parashtroi se e mbrojtura prej tij, në kërkesën e depozituar në gjykatë, ka bërë të ditur faktin se ka kryer lindje me operacion më datë 29 qershor dhe se, në këto kushte e ka pasur të pamundur të komunikojë lirshëm dhe privatisht me mbrojtësit. Sipas avokatit Brahimllari, në pamundësi të komunikimit, është e pamundur të realizohet një mbrojtje efektive.
“Në këtë situatë faktike, duke qenë në pamundësi për të siguruar një mbrojtje efektive, kërkon pezullimin e procesit, bazuar në të drejtën e çdo nëne,” tha Brahimllari.
Ai shtoi se Xoxa kërkon të jetë personalisht në seancat e ardhshme, pas përfundimit të afatit të pezullimit, pasi nuk i autorizon avokatët të vijojnë mbrojtjen pa praninë e saj. Avokati Brahimllari tha se është e drejta e Xoxës që t’i garantohet mbrojtja sipas ligjit dhe Kushtetutës.
Prokurori i çështjes, Altin Dumani u shpreh se përfaqësuesit e akuzës vlerësonin se procesi duhej të vijonte. Ai nënvizoi se në kërkesën e Xoxës referohet përcaktimi ligjor që parashikon shtyrjen e seancës dhe jo pezullimin e gjykimit deri në mbarimin e lejes. Sipas Dumanit, ligji nuk parashikon diçka të tillë.
Lidhur me shprehjen e vullnetit të të pandehurës për të qenë e pranishme në sallën e gjyqit, Dumani konstatoi se ajo nuk ka qenë e pranishme në asnjë prej seancave të mëparshme. Në përfundim, Dumani kërkoi që nëse gjykata do të konsideronte të nevojshme praninë e Xoxës, atëherë të vendosej ndarja e çështjes për këtë të pandehur.
Avokati Brahimllari kundërshtoi qëndrimin e SPAK lidhur me mungesën e përcaktimeve ligjore për pezullimin e çështjes në raste të tilla. Ai solli në vëmendje rastet kur vendoset pezullimi dhe theksoi se, për arsye se nëna e ka kryer lindjen me operacion, janë kushtet për pezullim. Sipas Brahimllarit, ndarja e çështjes nuk do të ishte ekonomike për gjykatën, ndërkohë që kërkoi të mundësohej mbrojtja efektive e Xoxës.
Pasi trupi gjykues shqyrtoi për afro një orë në dhomë këshillimi kërkesën e Xoxës, vendosi ta rrëzojë pjesërisht atë, duke mospranuar kërkimin për pezullimin e procesit, por e shtyu seancën me afat dyjavor. Sipas gjykatës, raporti është për leje lindje dhe jo për paaftësi në punë.
Gjykata konstatoi po ashtu, se e pandehura nuk ka marrë asnjëherë pjesë në seancat gjyqësore të zhvilluara më parë.
Në përfundim, gjykata vendosi edhe pezullimin e afteve të paraburgimit për kryebashkiakun Veliaj dhe e shtyu seancën për në datë 21 korrik,në orën 10:00.
Erion Veliaj u arrestua më 10 shkurt 2025, pasi akuzohet se së bashku me Xoxën ndërtuan një skemë komplekse korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit dhe nga biznesmenë kontraktorë të saj, duke përdorur një rrjet kompanish dhe organizatash jofitimprurëse. Veliaj dhe Xoxa i kanë mohuar akuzat.
Disa prej seancave të mëparshme të këtij procesi, janë shtyrë për shkak të mungesës së avokatëve. Po ashtu, pati dhe shtyrje për disa muaj të seancës paraprake, situatë që ngriti shqetësimin e SPAK, që e cilësoi si një strategji për zvarritjen e procesit.
