Prokuroria e Posaçme njoftoi të mërkurën përfundimin e hetimeve dhe dërgimin për gjykim të 15 të pandehurve të akuzuar për trafik ndërkombëtar të mbi 7 tonëve kokainë dhe rreth një ton hashash, ku dy personazhe të njohur të krimit shqiptar, Paurent Dervishaj dhe Ramazan Rraja cilësohen si anëtarë të thjeshtë të grupit.
Si drejtues dhe financues të grupit akuzohen të pandehurit Genti Nderjaku, i cili ka mbajtur dhe emrat Kili Nderjaku e Ekil Nderjaku; Nazmi Shahini i njohur dhe me emrin Nazmi Drazhi; Devid Patrut i njohur dhe me emrat Devid Boraj, Elidon Skëndaj e Fatmir Pepaj; Ermir Ndreaj; Artur Hoxhosmani; si dhe Erion Alibej i njohur edhe me emrat Erion Dylgjeriu e Andrea Dylgjeri.
Në pikën 1 të nenit 333/a të Kodit Penal përcaktohet se, “krijimi, organizimi ose drejtimi i një grupi të strukturuar kriminal për kyerjen e veprave penale dënohen me burgim nga tre deri në tetë vjet.
Si pjesëtarë të këtij grupi akuzohen të pandehurit Klevis Hoxhosmani; Plaurent Dervishaj; Ramazan Rraja; Amar Shkëmbi alias Dritan Shkëmbi; Amer Lloshi alias Ilir Lloshi; Julian Meçaj; Bledar Polovina; Bashkim Haxhija dhe Endrit Sinani.
Sipas SPAK, ka rezultuar se të pandehurit dhe bashkëpunëtorët e tyre kanë koordinuar me njëri-tjetrin në aktivitete të ndryshme kriminale edhe përmes komunikimeve në platformën e enkriptuar Sky ECC, të administruara nga autoritetet e drejtësisë franceze.
Nga hetimet është evidentuar se të pandehurit në bashkëpunim me persona të dënuar nga autoritetet e huaja, si dhe me persona të proceduar në Shqipëri apo të tjerë individë ende të paidentifikuar, kanë trafikuar lëndë narkotike në sasi të mëdha prej Brazilit, Ekuadorit, Kolumbisë, Marokut e Spanjës, me destinacion Italinë, Belgjikën, Spanjën dhe Holandën. Po ashtu, akuzohen se kanë tregtuar dhe ofruar për shitje në këto shtete evropiane mbi 8 ton lëndë narkotike, nga të cilat 7 ton e 261 kg kokainë; 590 kg hashash dhe 275 kg canabis sattiva.
Për një nga episodet e atribuuara të hetuarit Devid Patrut, rezulton se ai është dënuar nga autoritetet belge të drejtësisë. Për rrjedhojë, SPAK e konsideron si gjë të gjykuar këtë rast.
Ndërkohë, SPAK ka depozituar kërkesën për pushimin e hetimeve ndaj 3 personave të hetuar, pasi nuk janë vërtetuar akuzat e ngritura ndaj tyre.
Hetimet për këto episode të trafikimit të lëndëve narkotike janë zhvilluar në bashkëpunim me autoritetet e drejtësisë franceze, spanjolle, belge, britanike, holandeze, braziliane, italiane dhe ekuadoriane.
Për të mundësuar indentifikimin e personave të tjerë të përfshirë, SPAK ka ndarë çështjen dhe po vijon hetimet.
