Gjykata e Posaçme e Shkallës së Parë ka vendosur dënimin me 31 vjet e 4 muaj burgim të pesë personave të akuzuar nga SPAK për sigurim të kushteve për vrasje, grup i strukturuar kriminal, armëmbajtje pa leje dhe prodhim e shitje e lëndëve narkotike. Gjykimi për këtë çështje u zhvillua me procedurën e gjykimit të shkurtuar, prej nga të pandehurit përfituan uljen e 1/3-ës së dënimit. Vendimi u mor të mërkurën nga trupi gjykues i përbërë nga gjyqtarët Marinela Osmani, Atalanta Zeqiraj dhe Besmir Stroka.
I pandehuri Armando Ndreca, vëllai i ish-deputetit të Partisë socialiste, Eduard Ndreca, u dënua me 7 vjet e 4 muaj burgim për veprat penale “prodhim dhe shitja e narkotikëve”, e kryer në formën e veçantë të bashkëpunimit, atë të grupit të strukturuar kriminal dhe “grup i strukturuar kriminal”.
Edison Muceku u dënua me 5 vjet e 4 muaj heqje lirie për sigurim të kushteve për vrasje në dëm të shtetasit Hamza Terziu, si dhe për grup të strukturuar kriminal. Gjykata dha të njëjtën masë dënimi dhe për të pandehurin Elvis Ndreca, i akuzuar për sigurim të kushteve për vrasjen e Durim Bamit dhe për grup kriminal.
Dy të pandehurit Deivis Bajramaj dhe Adrian Pikili u dënuan me nga 6 vjet e 8 muaj burg secili, për veprën penale “mbajtja pa leje dhe prodhimi i armëve, armëve shpërthyese dhe municionit”. Ndërkohë, ata u deklaruan të pafajshëm për pjesëmarrje në grup të strukturuar kriminal.
Amando Ndreca dhe dy persona të tjerë, u dënuan shtatë muaj më parë për kultivimin e bimëve narkotike në zonën e Kashnjetit.
