Prokuroria e Përgjithshme dërgon në Gjykatë të Lartë ish-ministrin e Arsimit, i cili akuzohet për shpërdorim detyre me licensimin e kundërligjshëm të disa programeve mësimore të shkollës “Vitrina”.
Ish-ministri i Arsimit, Myqerem Tafaj do të gjykohet në Gjykatën e Lartë për veprën penale të shpërdorimit të detyrës, pasi akuzohet se lejoi në mënyrë të kundërligjshme hapjen e programeve mësimore në shkollën e lartë private “Vitrina”.
Prokuroria e Përgjithshme njoftoi të enjten se ka përfunduar hetimet për ish-ministrin Tafaj, aktualisht deputet i Partisë Demokratike, dhe ka dorëzuar në Gjykatën e Lartë kërkesën për gjykimin e tij.
Albi Serani, këshilltar për median i Prokurorisë së Përgjithshme tha se “veprimet hetimore kanë arritur në përfundimin se i pandehuri ka vendosur hapjen e programeve mësimore, në kundërshtim me vendimin e Këshillit të Akreditimit”.
“Për Prokurorinë e Përgjithshme, ky veprim i tij është kryer me dashje të drejtëpërdrejtë, pasi edhe pse ka patur një detyrim ligjor për ta respektuar, edhe pse vlerësimi i dhënë nga institucioni kompetent ishte i qartë (vlerësim negativ), ai ka vendosur hapjen e tyre në mënyre të kundraligjshme,” tha Serani në njoftimin për shtyp.
Hetimet për ish-ministrin Tafaj nisën më 22 prill 2015 nga Prokuroria e Përgjithshme, pas një kallëzimi të dorëzuar nga sekretari i përgjithshëm i ministrisë së arsimit, Plarent Ndreca. Në një deklaratë për shtyp, Tafaj e quajti kallëzimin një sulm politik dhe tha se gjatë detyrës së tij kishte respektuar Kushtetutën dhe ligjet e vendit.
Por hetimet e kryera nga Prokuroria e Përgjithshme kanë zbuluar se programet mësimore në shkollën private “Vitrina” nuk kanë qenë në përputhje me kriteret ligjore dhe aktet nënligjore për Arsimin e Lartë në Republikën e Shqipërisë. Prokuroria dyshon se përmes licensimit, Tafaj i ka mundësuar shkollës “Vitrina” të zgjeronte aktivitetin në fushën e arsimit, pa i plotësuar standardet e kërkuara.
Prokuroria shton në njoftimin për shtyp se ky vendim ka shkaktuar pasoja financiare për individët dhe për shtetin, duke i krijuar favore të pamerituara këtij institucioni arsimor.
Myqerem Tafaj ka qenë ministër i Arsimit dhe Shkencës në mandatin e dytë të Partisë Demokratike, përgjatë viteve 2009-2013. Shkolla e lartë private “Vitrina” është licensuar në vitin 2009 nga Këshilli i Ministrave, me propozim të ministrit të Arsimit.
Shkolla e lartë “Vitrina” u kthye në simbol të sistemit të rrënuar të arsimit të lartë në Shqipëri nga qeveria e majtë e Edi Ramës, e cila në 6 gusht 2014 vendosi t’i heqë licensën, bashkë me 17 institucione të tjera të arsimit të lartë.
Një version i mëparshëm i këtij artikulli thoshte gabimisht në titull dhe nëntitull se Tafaj është në gjyq për licencimin e shkollës “Vitrina”. Në fakt Tafaj është në gjyq vetëm për licencimin e disa programeve të shkollës “Vitrina”. Kërkojmë ndjesë për pasaktësinë.
