Prokuroria njoftoi të mërkurën nëpërmjet një deklarate se Prokurori i Përgjithshëm Adriatik Llalla ka firmosur një urdhër për krijimin e një strukture të posaçme për verifikimin e integritetit të zyrtarëve publikë, në zbatim të ligjit të njohur ndryshe edhe si ligji i ‘dekriminalizimit.’
“Ligji “Për garantimin e integritetit të personave që zgjidhen, emërohen ose ushtrojnë funksione publike” dhe Kreu VII i Vendimit të Kuvendit të Republikës së Shqipërisë nr.17 datë 04.03.2016 “Për përcaktimin e rregullave të detajuara mbi zbatimin e ndalimeve të parashikuara në ligjin nr.138/2015…”, përcakton organin e Prokurorisë si institucioni përgjegjës për verifikimin e integritetit të zyrtarëve në të gjithë administratën publike,” tha Prokuroria në njoftim për shtyp.
“Bazuar në aktet ligjore të mësipërme, Prokurori i Përgjithshëm urdhëron krijimin e Sektorit të Verifikimit të Integritetit të Personave që Zgjidhen, Emërohen ose Ushtrojnë Funksione Publike, i cili do të përbëhet nga 2 prokurorë, 3 oficerë të Policisë Gjyqësore dhe një specialist i Teknologjisë së Informacionit,” organi i akuzës shtoi.
Ligji për “për garantimin e integritetit të personave që zgjidhen, emërohen ose ushtrojnë funksione publike”, i njohur ndryshe si ligji i dekriminalizimit u miratua më 17 dhjetor në Kuvend, edhe falë presionit të organizmave ndërkombëtare.
Që të bëhej i zbatueshëm, ligji kërkonte plotësimin deri më 6 mars me aktet nënligjore dhe formularin e vetëdeklarimit-afat që u respektua falë marrëveshjes së arritur me vështirësi nga palët e përfshira në proces.
Dy ditë përpara skadimit të afatit të parashikuar në ligj parlamenti aprovoi me konsensus aktet nënligjore për ligjin e ‘dekriminalizimit,’ pas negociatave intensive midis përfaqësuesve të opozitës dhe mazhorancës. Miratimi me konsensus i akteve nënligjore dhe formularit të vetëdeklarimit erdhi pas negociatave mes deputetëve të Partisë Socialiste dhe atyre të Partisë Demokratike, të cilat zgjatën më shumë se 48 orë në Kryesinë e Kuvendit.
Në zbatimin të ligjit Prokurori i Përgjithshëm Llalla ka urdhëruar krijimin e rregjistrit të kërkesave për verifikim të integritetit të zyrtarëve publkë si dhe krijimin e regjistrit për formularët e vetdeklarimit.
Gjithashtu urdhëri i Prokurorit mundëson krijimin e një sistemi elektronik për regjistrimin, ruajtjen dhe dokumentimin e kërkesave për verifikim, të dhënave, akteve apo fakteve të administruara, rezultatet e verifikimit dhe të dhënave të grumbulluara si pjese procesit të verifikimit të së kaluarës së dyshuar kriminale të zyrtarëve publik.
