Komisionit të Pavaruar të Kualifikimit dhe Opercacioni Ndërkombëtar i Monitorimit kanë zbuluar lidhje të shumfishta midis anëtarit të Gjykatës së Lartë Shkëlzen Selimi dhe krimit të organizuar – përfshirë ndikimin e paligjshëm për të penguar esktradimin e një trafikanti ndërkombëtar droge në Itali.
Të premten Komisioni i Pavarur i Kualifikimit me kryesuese Etleda Çiftja, relatore Valbona Sanxhaktari dhe anëtare Xhensila Pine, dhe përfaqësues ndërkombëtar Z. John Leonard, mbajti seancën dëgjimore publike për procesin e rivlerësimit të gjyqtarit të Gjykatës së Lartë Shkëlzen Selimi.
Shkëlzen Selimi është anëtar i Gjykatës së Lartë që nga viti 2011. Ai është anëtari i shtatë i Gjykatës së Lartë që përballet me procesin e vetingut. Më parë, Komisioni i Pavarur i Kualifikimit ka marrë vendimet e shkarkimit për Admir Thanzën, Tom Ndrecën dhe Artan Zenelin si dhe ka konfirmuar në detyrë Edmond Islamajn, Xhezair Zaganjorin dhe Ardian Dvoranin.
Selimi është diplomuar në fakultetin e Drejtësisë në vitin 1996 dhe ka mbaruar Shkollën e Magjistraturës në vitin 2000. Në tetor 1999 deri në shtator 2000, Z. Selimi ka ushtruar detyrën e gjyqtarit pranë Gjykatës së Rrethit Gjyqësor Krujë dhe gjatë periudhës 2000-2011 ka ushtruar detyrën e gjyqtarit pranë Gjykatës së Vlorës.
Krahas ushtrimit të detyrës së gjyqtarit, Shkëlzen Selimi ka qenë edhe lektor në universitetet “Ismail Qemali” dhe “Pavarësia” në Vlorë. Aktualisht, ai është pedagog i jashtëm pranë Fakultetit të Drejtësisë në Tiranë si dhe ekspert pranë Shkollës së Magjistraturës
Seanca dëgjimore e filloi me një kërkesë procedurale të subjektit, me anë të të cilës Selimi kërkoi një hetim disiplinor nga Kolegji i Posaçëm i Apelimit dhe Operacioni Ndërkombëtar i Monitorimit mbi rrjedhjen e të dhënave sensitive të hetimit nga KPK ndaj televizioni Top Channel, si dhe pezullimin e procesit të rivlerësimit.
“Ky televizioni ka arritur të ndikojë në proces,” tha Selimi duke iu referuar një kronike të tansmetuar ën Top Channel ditën e enjte, ku flitej për përgjime të gjyqtarit me anëtarë të krimit të organizuar.
Trupa e KPK-së në një vendim të ndërmjetëm e hodhi poshtë kërkesën e gjyqtarit Selimi, duke vendosur vazhdimin e seancës dëgjimore. Gjyqtari reagoi ndaj vendimit duke u shprehur se ishte prishur procesi i rregullt gjyqësor.
“Kam ardhur këtu të mbroj nderin dhe dinjitetin tim, pasi kam mbajtur barrë të rëndë si gjyqtar duke dhënë dhjetra burgime të përjetshme,” tha Selimi përpara se të largohej nga seanca.
Pas largimit të Selimit nga salla, relatorja Valbona Sanxhaktari lexoi relacionin e përgatitur nga KPK duke njoftuar se hetimi administrativ ishte përqendruar te kriteri i pastërtisë së figurës. Sanxhaktari njoftoi se pas administrimit të raporteve për subjektin nga DSIK, ILDKPKI dhe KLD, KPK ka ndërmarrë një hetim të pavarur administrativ për të verifikuar të dhënat e paraqitura nga raporti i DSIK-së.
Në raportin e saj Drejtoria e Sigurimit të Informacionit të Klasifikuar e ka cilësuar gjyqtarin Selimi si të ‘papërshtatshëm’ për shak të një seri kontaktesh jo rastësore me përfaqësues të krimit të organizuar dhe dyshime për përfshirje në korrupsion pasiv në më shumë se një rast, duke e cilësuar gjyqtarin si “një person me tendenca për përfshirje në veprimtari kriminale’ ose ‘që mund te vihet nën presion nga krimi i organizuar.”
Për të vërtetuar raportin e DSIK-së KPK ka marrë informacione nga disa institucione zyrtare dhe subjekti, nga ka rezultuar se gjyqtari Selimi ka udhëtuar disa herë jashtë shtetit në Itali dhe Gjermani me shtetasin Fero Dervishaj, i cili ka precedentë kriminalë. Gjithashtu prindërit e gjyqtari dhe të Dervishajt janë përpjekur të hapin një biznes së bashku. Dervishaj ishte dënuar më parë për armëmbajtje pa leje dhe është hetuar në vitin 2013 si pjesë e një grupi të strukturuar kriminal që trafikonte sasi të mëdha lëndësh narkotike drejt Italisë. KPK ka arritur përfundimin se Dervishaj ishte një person me lidhje me krimin e organizuar dhe gjyqtari kishte kontakte të papërshtashme me të.
Sipas KPK-se kontakte të papërshtatshme subjekti i rivlerësimit ka pasur dhe me shtetasin I.Ç, i skeduar si i lidhur me krimin e organizuar në vitet 1999-2006 dhe avokatin A.D, i dënuar për mashtrim dhe i dyshuar si i lidhur me tranfikantë ndëkombëtarë lëndësh narkotike. Kjo e fundi është cilësuar nga KPK si lidhje problematike.
Gjithashtu, KPK ka administruar një informacion të besueshëm të ardhur nga Operacioni Ndërkombëtar i Monitorimit, sipas të cilit gjyqtari ka ndikuar në mënyrë të paligjshme për mosekstradimin në vitin 2015 drejtë Italisë të shtetasit Arben Isufaj, i cili është dënuar në vendin fqinj për trafik ndërkombëtar lëndësh narkotike. Sipas ONM-së në vitet 2010-2012 subjekti ka përdorur një makinë në emër të shtetasit A.Sh, i cili është dhe shoferi i Arben Isufajt – i njohur gjithashtu si Ben Qimja. Subjekti sipas KPK-së ka pasur kontakte të papërshtatshme me Arben Isufajn, i cilësuar si anëtar i krimit të organizuar.
Vendimi për gjyqtarin Selimi do jepet të hënën me 30 korrik ora 9:30.
