Përfaqësuesi për lirinë e medias në Organizatën për Siguri dhe Bashkëpunim në Europë, OSBE, u shpreh i shqetësuar për sulmin ndaj gazetarit të News 24, Enver Doçi gjatë një operacioni policie.
Përfaqësuesi i OSBE-së për lirinë e medias, Harlem Desir është shprehur i shqetësuar për sulmin fizik të shtunën në Dibër ndaj gazetarit Enver Doçi, duke i kërkuar autoriteteve që ta hetojnë rastin.
“Jam i shqetësuar për sulmin fizik të shtunën ndaj gazetarit të News 24 Enver Doçi gjatë një operacioni policor në Shqipëri,” tha Desir nëpërmjet një njoftimi në Twitter. “Dhuna kundër pjesëtarëve të medias është e papranueshme. Unë i bëj thirrje autoriteteve që të sigurojnë mbrojtjen e gazetarëve gjatë raportimit,” shtoi ai.
Doçi u godit nga një polic i forcave RENEA të shtunën kur po filmonte me telefonin e tij celular gjatë një operacioni të policisë në Dibër. Policia e ka pranuar sulmin fizik ndaj Doçit, por ka kërkuar mirëkuptim duke ja vënë fajin tensionit që ka pasur efektivi i saj gjatë operacionit policor. Policia argumentoi se punonjësi i saj ishte nën tension gjatë operacionit të arrestimit të një personi me precedentë të shumëfishtë penalë.
“Policia e Shtetit shpreh keqardhje për këtë incident duke i kërkuar ndjesë gazetarit të TV “Neës 24,” tha policia e shteti nëpërmjet një njoftimi.
Sulmi ndaj Doçit vjen një javë pas publikimit të një raporti prej 7 organizatash ndërkombëtare, i cili nënvizonte se Shqipëria ka bërë hapa pas për sa i përket lirisë së medias.
