Rrebeshet e shiut kanë sjellë përmbytjen e 2 mijë hektarëve tokë në Lezhë, ndërsa dhjetra familje janë evakuuar. Kryebashkiaku Pjerin Ndreu akuzoi OSHEE për mungesë të energjisë në hidrovore që sipas tij kishte rënduar përmbytjen.
Rrebeshet e shiut gjatë 24 oreve të fundit, janë shoqëruar me përmbytje, rreshqitje dherash dhe dëmtimin e një ure në rajonin e Lezhës, ndërsa dhjetra familje janë evakuuar dhe mbi 2 mijë hektarë tokë është përmbytur.
Autoritetet lokale bënë me dije se lumi Drin kishte dalë nga shtrati në disa pika, duke përmbytur një pjesë të shetitores në qytetin e Lezhës si dhe dhjetra hektarë tokë bujqësore në lagjen e ish-frutores, në Balldre dhe Gocaj.
Banorët thanë se askush nuk ishte intersuar për situatën, ndërsa u shprehën të frikësuar se uji mund të arrinte në shtëpi. Një prej tyre tha se situata përsëritej për herë të parë që prej vitit 2002. “Uji më ka mbuluar gjithë rrugën dhe oborrin e shtëpisë dhe nësë do vazhdojnë reshjet me këtë itensitet uji do hyjë në banesat e lagjes tonë”, tha ai.
Kryebashkiaku i Lezhës Pjerin Ndreu akuzoi OSHEE për situatën, duke pretenduar se ndërprerja e energjisë në hidrovore gjatë natës kishte sjellë edhe rëndimi e situatës. “Kjo ka ardhur dhe nga mos funksionimi i hidrovoreve për shkak të mungeses së energjisë elektrike gjatë natës dhe kjo është e pafalshme për OSHEE”, tha Ndreu.
Prefekti i Lezhës Gjok Jaku bën të ditur se përgjatë 24 oreve në rajonin e Lezhës kanë rënë 120 mm shi dhe aktualisht janë nën ujë 2 mijë hektarë tokë bujqësore. Ai bën të ditur se nga shkarkimet që kanë nisur nga hidrocenralet e Ulëzës dhe Shkopetit ka shtim të prurjeve në Lumin Mat, por nuk ka rrezik për përmbytje. “Nëse nuk do ketë reshje me itensitet të lartë situata mund të përmiresohet brenda 24 orëve”, tha Jaku që pretendoi se tani hidrovorët ishin në punë.
Një situatë e rënduar paraqitete edhe në Shkodër. Ministria e Mbrojtjes njoftoi se me kërkesë të bashkisë kishte dërguar një batalion të ushtrisë në zonë dhe po kryhej evakuuimi i disa familjeve. Ministria njoftoi se ishin evakuuar 75 banorë në fshatin Ana e malit.
Banorët thonë se kjo situatë nuk ishte parë që prej vitit 2002 dhe se ishin të frikësuar nëse reshjet do të vazhdonin me këtë itensitet. “Unë kam shtëpinë këtu në lagjen i ish-frutores dhe kjo situatë nuk është parë që prej vitit 2002, kur ka qenë përmbytja e madhe. Ai tha se askush nuk ishte interesuar dëri në atë moment për gjendjen e tyre.
Ndërkohë vërshimi i kanalit të ujerave të larta bllokoi akset rrugore që lidhin fshatrat Kallmet dhe Mërqi me superstradën Lezhë-Shkodër. Një qytetar u rrezikua seriozisht nga situata, pasi motorri me të cilin lëvizte u rrëmbye nga rrjedha e ujit në Mërqi.
Po ashtu është dëmtuar “Ura e Gjadrit ” që lidh fshatrat Zojs dhe Grash në Njesinë Administrative të Dajçit në Lezhë. Qindra hektarë tokë bujqësore në Zadrimë dhe Torovicë, janë përmbytur, përfshi varrezat e fshatit Gocaj në Lezhë.
Situata ndërkohë është e rënduar edhe në lagjen e spitalit në qytetin e Lezhës. Një masiv i konsiderueshem dherash dhe gurësh ka rrëshqitur, duke rrezikuar shembjen e disa banesave që ndodhen në kodrën ku ka ndodhur rrëshqitja dhe pranë rrugës kryesore.
“Unë kam banesën këtu pranë dhe ka qenë ora 3:00 e mëngjesit të së premtes kur ndodhi rrëshqitja. E gjithë familja dolëm jashtë dhe fillimisht menduam që ra tërmet”, tha një banorë. Ai tregoi se kishin dalë nga shtëpia dhe nëse nuk merreshin masa aty mund të ndodhte një katastrofë.
Kryebashkiaku i Lezhës Pjerin Ndreu tha se ishin evakuar disa familje në këtë zonë, teksa tha se mungesa e energjisë në hidrovore gjatë natës ka ndikuar në agravinin e situatës së përmbytjeve. “Është një zonë në lagjen e spitalit, ka rrëshqitur dheu dhe rrezikon disa banesa”, tha Ndreu, ndërsa shtoi se shpresonte që moti t’u jepte mundësi që të ndërhynin.