Bashkia e qytetit bregdetar ka mohuar raportet në media për dorëheqjen e kryetarit, Zhyljen Varfaj për arsyet shëndetësore.
Kryetari i Bashkisë Durrës Zhuljen Varfaj vijon të jetë në krye të bashkisë së qytetit bregdetar, pavarësisht informacioneve që qarkulluan në media një ditë më parë, duke aluduar për një dorëheqje të mundshme nga ana e tij.
“Kryetari i bashkisë vijon të jetë në detyrë dhe nuk ka asnjë vendim për dorëheqjen e tij”, tha për BIRN një zëdhënës i bashkisë.
Varfaj u emërua në krye të bashkisë nga Këshilli Bashkiak Durrës pas dorëheqjes së papritur të ish-kryetares Valbona Sako në fillim të dhjetorit, pas tërmetit vdekjeprurës që la 51 viktima dhe qindra të plagosur. Dorëheqja e Sakos u shoqërua më një valë largimesh në bashkinë e Durrësit.
Nënkryetarja Etleva Kondi dhe drejtoresha e kabinetit, Keli Kërtusha dhanë dorëheqjen pas Sakos. Kërtusha u zëvendësua në janar nga Rovena Rozhani, deri në atë kohë zëdhënëse për mediat në Ministrinë e Turizmit dhe Mjedisit.
Dorëheqja tjetër ishte ajo e Drita Zenelit, Drejtoreshë e Burimeve Njerëzore, që e la postin të lirë deri në zgjedhjen e drejtoreshës së re, Stela Shkarpa, e cila po ashtu dha dorëheqjen dhe drejtoria mbeti pa drejtues deri në zgjedhjen e Patriot Beqarajt në shkurt të këtij viti.
Adhurim Qehajaj, i cili prej 10 vitesh mbante postin e kreut të urbanistikës në bashkinë e Durrësit dha dorëheqjen dhe u zëvendësua nga Dorina Isufi, që mbante të njëjtin post në bashkinë Shijak.
Lëvizjet e fundit në bashki erdhën rreth një javë më parë, kur drejtuesja e Drejtorisë së Përgjithshme të Shërbimeve dhe Punëve Publike, Emiriana Sako, u emërua në postin e nënkryetares së bashkisë – pjesë e së cilës është prej vitit 2009.
Aktualisht në Bashkinë Durrës mbetet i lirë posti i drejtorit të Drejtorisë së Përgjithshme të Shërbimeve dhe Punëve Publike dhe i drejtorit të Drejtorisë së Përgjithshme Ligjore, Arsimit dhe Kulturës dhe Burimeve Njerëzore.
Këtë post deri në janar e mbante Dalina Bucaj, e cila u zgjodh në krye të Tatimeve Durrës, një post që drejtohej nga ish-kryetarja Valbona Sako deri kur vendosi të kandidonte për postin e kryebashiakes së Durrësit në 30 qershor 2019.