Lajm27 Dec 2018

Shtatë organizata i kërkojnë qeverisë të tërhiqet nga ligjet për mediat

Organizatat shqiptare të medias dhe të mbrojtjes së të drejtave të njeriut dërguan një letër të hapur qeverisë së Kryeministrit Edi Rama duke i kërkuar tërheqjen e dy projektligjeve që synojnë të "disiplinojnë" median në internet.

Autor: Gjergj Erebara BIRN Tiranë
Printo

Kryeministri Edi Rama gjatë një seance parlamentare më 18 qershor 2018. Foto: Malton Dibra/LSA

Shtatë organizata jofitimprurëse që përfaqësojnë gazetarët ose që punojnë në fushën e mbrojtjes së të drejtave të njeriut kritikuan të Enjten planet e qeverisë së kryeministrit Edi Rama për “disiplinimin” e medias në internet duke i konsideruar ato si tentativë për krijimin e një regjimi policor mbi median.

“Organizatat besojnë se të dy projektligjet, në formë dhe në frymë bien ndesh me Kushtetutën e Republikës së Shqipërisë dhe me Të Drejtën Europiane. Ato përbëjnë kufizim krejtësisht të panevojshëm të lirisë së shprehjes e lirisë së medias dhe përmbajnë rrezikun e krijimit të një regjimi policor mbi median në internet,” shkruhet në letër.

“Parë kjo në kuadër të gjendjes aktuale të medias në Shqipëri, me dominimin e “lajmeve” false që shpërndahen nga zyrat e shtypit dhe që prezantohen si informacione të pavarura në median konvencionale, kryesisht televizione, synimi i projektligjeve duket se është vendosja nën kontroll të plotë të informacionit në duart e qeverisë,” vijon më tej letra.

Autoriteti i Medias Audiovizive dhe Autoriteti i Komunikimeve Elektronike e Postare zhvilluan të Enjten një seancë dëgjimore të dytë mbi projektligjet e propozuara. Në këtë takim, përfaqësues të organizatave të mbrojtjes së të drejtave të njeriut deklaruan edhe një herë kërkesën për tërheqjen e projektligjeve.

Organizatat nënshkruese të letrës janë BIRN Albania, Shoqata e Gazetarëve Profesionistë të Shqipërisë, Lidhja e Gazetarëve të Shqipërisë, AIS/Open Data Albania, Civil Rights Defenders, Këshilli Shqiptar i Medias dhe Qendra Shqiptare MediaLook.

Të mërkurën, katër organizata ndërkombëtare të lirisë së medias, Federata Europiane e Gazetarëve, Qendra Europiane për Liri të Medias dhe të Shtypit, PEN International dhe Reporterët pa Kufi, i dërguan një letër publike kryeministrit Edi Rama duke i kërkuar të tërheqë projektligjet.

“Iniciativa juaj bie ndesh praktikave më të mira dhe është kundër rekomandimeve të OSBE-së dhe shkakton shqetësime të mëdha për ne,” shkruhet në letër. “Nëse projektligjet e propozuara miratohen nga parlamenti, ato do të dëmtojnë rëndë qarkullimin e lirë të informacionit dhe do të kenë efekt pengues për median në internet e do të kufizojnë të drejtën e qytetarëve shqiptarë për akses në informim,” vijon më tej letra.

Dy projektligjet, Për “Disa ndryshime dhe shtesa në ligjin nr. 97/2013 “Për Mediat Audiovizive në Republikën e Shqipërisë”, të ndryshuar” dhe “Disa shtesa dhe ndryshime në ligjin Nr. 9918 Datë 19.5.2008 “Për Komunikimet Elektronike në Republikën e Shqipërisë” i ndryshuar”, synojnë të krijojnë një regjistër të mediave në internet dhe i japin të drejtë një institucioni të quajtur “Këshilli i Etikës” të gjobisë mediat në bazë të kërkesave të të tretëve ose të urdhërojë mbylljen e mediave ose të aksesit në faqe interneti në territorin e Republikës së Shqipërisë.

 

Lexo më shumë:

Organizatat ndërkombëtare i kërkojnë Ramës të tërheqë ligjet për mediat

Kërcënimi për censurë të faqeve të internetit kritikohet

Qeveria propozon këshill censure për median në internet