Shërbimi Social Shtetëror zhvendosi tre vajzat me probleme të shëndetit mendor në dy qendra të ndryshme pasditen e së enjtes ndërsa autoritetet janë ende në kërkim të një zgjidhjeje për nënën.
Një nga tre motrat e një familjeje me probleme të shëndetit mendor në Lezhë, të cilat rezultojnë të abuzuara seksualisht dhe të pambrojtura nga autoritetet prej vitesh, u dërgua në një qendër sociale shtetërore në qytetin e Elbasanit ndërsa dy motrat e tjera u dërguan në qytetin e Vlorës, bëri të ditur Shërbimi Social Shtetëror.
“Në qendrat ku janë vendosur tre motrat janë hapësirat e limituara,” bëri të ditur një zyrtar i Shërbimit, i cili nuk pranoi të citohet për shkak se nuk ishte i autorizuar.
“Po mendohemi të gjejmë zgjidhje edhe për nënën e tyre,” shtoi ai.
Një investigim i BIRN afro një vit më parë bëri të ditur se tre motra me probleme të shëndetit mendor janë abuzuar prej vitesh seksualisht para syve të institucioneve shtetërore në Lezhë, të cilat e pasojnë problemin te njëra-tjetra përmes shkresave dhe ngrenë duart të dorëzuar kur pyeten nëse motrat mund të mbrohen nga shteti. [Link investigimi]
U desh një vit që Shërbimi Social Shtetëror të gjejë një zgjidhje për rastin.
Njëra nga vajzat e cila është dhe shtatzënë është strehuar në një qendër në qytetin e Elbasanit pikërisht ku ndodhen dhe dy fëmijët e lindur prej tyre, ndërsa dy të tjerat janë dërguar në një qendër tjetër, në qytetin e Vlorës.
Transferimi i tyre nga Lezha drejt këtyre qendrave është bërë pasditen e së enjtes në prani dhe të përfaqësuesve të Shërbimit Social Shtetëror dhe Ministrisë së Shëndetësisë dhe Mbrojtjes Sociale. Tre motrat janë shoqëruar edhe nga nëna e tyre e cila më pas është rikthyer sërish në qytetin e Lezhës.
Duke qene se dhe kjo e fundit ka probleme të shëndetit mendor si tre vajzat e saj, gjatë ditës së premte është parë duke ulëritur pranë ambienteve të Shërbimit Social në Lezhë.
Kjo e fundit kërkon që të qëndroje me vajzat e sajë pikërisht në qendrat ku janë vendosur, pasi kështu e konsideron veten të braktisur.
Të pyetur nga Birn pse nuk është gjetur zgjidhje për nënen e vajzave përfaqësuesit e Shërbimit Social Shtetëror në Lezhë thonë janë duke kërkuar një zgjidhje pasi hapësirat në qendrat sociale janë të kufizuara.
Njëra nga motrat është aktualisht shtatzënë dhe është vendosur që të mos abortoje, ndërsa sipas të dhënave edhe 2 fëmijët e tjerë që kanë lindur janë me probleme të shëndetit mendor.