Ambasada amerikane përgënjeshtron Rilindjen Demokratike, përsërit kërkesën për dekriminalizim

Ambasada thotë se lista me deputetë “non grata” e publikuar te RD nuk është hartuar prej saj, ndërsa i nxit të gjitha partitë të largojnë personat e inkriminuar apo të korruptuar.

Ambasada e Shteteve të Bashkuara të Amerikës në Tiranë deklaroi sot se një listë me emra deputetësh e publikuar në gazetën zyrtare të Partisë Demokratike Rilindja Demokratike me nëntë deputetë për të cilët RD pretendonte se janë shpallur “non grata” nga ambasada, është e rreme.

PD publikoi listën me deputetë nga Partia Socialiste dhe nga Lëvizja Socialiste për Integrim por pa asnjë deputet të sajin pas lajmeve të publikuara në media të cilat thoshin se ambasada e SHBA-ve ka anuluar një takim inagurues të një forumi të quajtur “Grupi Parlamentar i Miqësisë Shqipëri-SHBA”. Media pati komentuar më herët se anulimi lidhej me praninë në grupin e miqësisë të disa deputetëve të përfolur publikisht ose jo nga ambasada si njerëz të dyshuar për lidhje kriminale.

Pas kësaj Rilindja Demokratike publikoi listën që sipas saj përmbante nëntë deputetë të padëshiruar.

“Lajmi i publikuar fillimisht në gazetën Rilindja Demokratike dje që i referohej një liste me nëntë deputetë të konsideruar “non grata” nga ambasada e SHBA-ve është tërësisht fabrikim,” thuhet në njoftimin e ambasadës.

“Ambasada monitoron nga afër çështje të krimit dhe korrupsionit në të gjtiha partitë politike, por Ambasada nuk e ka hartuar atë listë,” vijon më tej deklarata.

Partitë politike parlamentare miratuan në dhjetor të vitit të kaluar një rezolutë parlamentare që kërkon mes të tjerash, fillimin e procedurave ligjore për dekriminalizimin e parlamentit dhe jetës politike në vend, proces ky i kërkuar nga Partia Demokratike.

Çështja e dekriminalizimit u rikthye në vëmendjen e publikut në 2 mars, kur kryeministri Edi Rama njoftoi se ka vendosur të përjashtojë deputetin Tom Doshi nga grupi parlamentar socialist. Përjashtimi i Doshit erdhi pasi deputeti i Shkodrës, i përfolur prej kohësh për aktivitete kriminale, bëri disa deklarata publike ku akuzoi për korrupsion zyrtarë të ndryshëm të qeverisë, përfshirë Drejtoreshën e Përgjithshme të Tatimeve Briseida Shehaj dhe ish Drejtoreshën e Përgjithshme të Doganave Elisa Spiropali. Pas përjashtimit, Doshi ngriti akuza publike ndaj kreut të parlamentit Ilir Meta duke thënë se ai kishte komplotuar për ta vrarë.

Megjithëse përjashtimi i Doshit nga grupi i deputetëve socialistë erdhi si pasojë e mosmarrëveshjeve politike me kryeministrin Rama, ambasada e SHBA-ve në Tiranë dhe Delegacioni i Bashkimit Europian përshëndetën largimin e tij dhe shfrytëzuan rastin për të bërë thirrje për fillimin e dekriminalizimit të parlamentit.

Pavarësisht kësaj, largimi i Doshit nuk u pa nga palët si një fillim i procesit të dekriminalizimit. Partia Demokratike nisi një fazë të re mospjesëmarrjeje në jetën parlamentare, me argumentin se nuk ndjehen të sigurtë, gjë që është interpretuar nga qarqet diplomatike si një tentativë për rikthim te politika e bojkotit.

Kryeministri Edi Rama nga ana e tij deklaroi se “nuk kishte dijeni që në parlament të ketë njerëz të inkriminuar.”

Ambasada amerikane rithekson në deklaratën e sotme se “nxit të gjitha forcat politike që të heqin të gjithë individët e përfshirë në aktivitete kriminale apo korruptive si dhe mbështet punën e parlamentit për të hartuar ligje në përputhje me Rezolutën e 24 dhjetorit 2014”.