Këshilli Mbikëqyrës i Bankës Qëndrore mbështeti guvernatorin pas thirrjeve për dorëheqje në lidhje me vjedhjen e zbuluar së fundmi në këtë bankë
Guvernatori i Bankës qëndrore të Shqipërisë Ardian Fullani fitoi mbështetjen formale të anëtarëve të Këshillit Mbikëqyrës pas kërkesës së hedhur nga njëra prej anëtareve të Këshillit që ai të shkarkohet nga detyra për shkak të vjedhjes te kasafortat e bankës të zbuluar më 21 korrik.
Ndërsa Ermelinda Meksi kërkoi shkarkimin e Guvernatorit, “të pesë anëtarët e tjerë të Këshillit nuk e pranuan propozimin e saj,” njoftoi banka të Enjten pas një takimi që zgjati për katër orë.
Fullani po përballet me zemërimin e publikut për vjedhjen e 713 milionë lekëve (rreth 5.1 milionë euro), vjedhje që i atribuohet një punonjësi të vetëm i cili ka pranuar përgjegjësinë dhe pretendon se ka vepruar vetëm.
Shumë protesta janë organizuar duke kërkuar dorëheqjen e guvernatorit Fullani por duket se ai gëzon mbështetjen e partive politike kryesore dhe shumicës së bordit të bankës. Bordi është i vetmi institucion me të drejtë për të shkarkuar guvernatorin sipas dëshirës.
Gjithsesi tellashet duket se nuk kanë mbaruar për guvernatorin. Një dëgjesë publike pritet të zhvillohet në parlament në shtator ndërsa disa aktivistë kanë premtuar se do të vijojnë betejën e tyre për të detyruar guvernatorin të japë dorëheqjen.
