Ndalimi i 38 emigrantëve nga Briri i Afrikës shkaktoi një alarm të shkurtër fals për virusin Ebola
Shqipëria po rimerr veten pas alarmit fals për Ebola pasi policia ndaloi 38 emigrantë nga Eritrea në një zonë malore dhe arrestoi dy të dyshuar si trafikantë të martën.
Frika për infektim me virusin vdekjeprurës u përhap pasi mjekët në Vlorë, 145 kilometra në jug të kryeqytetit, Tiranë, i thanë gazetarëve se kampionë nga emigrantët afrikanë janë dërguar për testim te Instituti i Shëndetit Publik, ISHP, në Tiranë.
Silva Bino, nga Instituti i Shëndetit Publik, hodhi poshtë lajmin. “Nuk ka asgjë të vërtetë,” tha ajo. Eltar Deda, nga Ministria e Shëndetësisë, i tha BIRN se emigrantët morën ndihmë mjekësore por asgjë në lidhje me Ebolën nuk qe e nevojshme.
Shqipëria përdoret shpesh si pikë tranzit për emigrantët afrikanë që përpiqen të arrijnë Europën Perëndimore në Greqi. Ata paguajnë banorë vendës për t’i transportuar përtej kufitir nga Greqia dhe më pas, përtej kufirit me Malin e Zi.
Policia shqiptare zakonisht i ndalon ata për pak ditë dhe i lë të lirë. Eritrea është një nga vendet më të varfra në botë dhe qeveriset nga një regjim shtypës.
Gjithsesi ky vend gjendet mijëra kilometra larg vendeve të Afrikës Perëndimore, të cilat janë qendra e epidemisë së virusit Ebola.
Inspektoriati i Shëndetësisë në Shqipëri i porositi shqiptarët më 6 gusht të mos udhëtojnë drejt Afrikës dhe njoftoi se ka ashpërsuar kontrollin e kufirit. Aktualisht, virusi Ebola është i pranishëm në katër vende në Afrikën Perëndimore – Guinea, Liberi, Nigeri dhe Siera Leone.
