Anëtari i Partisë Socialiste Agron Cane, 60 vjeç, u arrestua me dyshimin se i tha nënës së një 14 vjeçareje se vajza e saj do të ketë ‘të ardhme’ nëse adoleshentja bënte seks me të
Policia të shtunën arrestoi 60 vjeçarin Cane, anëtar i partisë Socialiste në qeveri në Shqipëri, pasi një lajm u publikua nga media vendëse ku paraqitej një kasetë ku aktivisti diskutonte propozimin e tij me nënën e vajzëz 14 vjeçare.
Lajmi thotë se Cane, një ish ndihmës i deputetit Socialist Koço Kokëdhima, dëgjohej duke thënë në bisedë se qe joshur nga adoleshentja dhe se i kërkonte nënës “të sillte vajzën” për të.
“Ajo do të ketë një të ardhme,” raportohet të thotë Cane gruas së ve, nënë e katër fëmijëve, bashkëshorti i së cilës, një punëtor ndërtimi, vdiq në një aksident në punë pesë vjet më parë.
Policia e arrestoi Canen në qytetin e Sarandës, 290 kilometra në jug të Tiranës disa orë pasi lajmi u publikua në stacionin televiziv Neës 24.
Por avokati i tij, Gjergji Imeraj, tha se video qe e montuar dhe lajmi qe i rremë.
“Jemi të bindur se video është e montuar, historia është e montuar, sepse edhe gazetarët që kanë marrë pjesë në këtë histori janë gazetarë, problematikë,” tha Imeraj.
Telnis Skuqi, gazetari që raportoi lajmin, tha se nëna e vajzës e pati kontaktuar atë dhe i pati kërkuar ta ndihmonte për dokumentimin e kërkesave të Canes duke i dhënë një kamera të fshehtë.
“Kur pashë videon për herë të parë u trondita. Ndjehem krenar që arrita ta zbuloj këtë,” i tha Skuqi BIRN.
Deputeti Kokëdhima lëshoi një deklaratë duke dënuar Canen, por theksoi se ai nuk kishte punuar për deputetin që nga mesi i korrikut.
“Ai ka qenë një nga disa aktivistët e zyrës tonë, i caktuar me detyrën të dëgjojë ankesat dhe kërkesat e qytetarëve të zonës,” thuhet në deklaratë.
Partia Demokratike në opozitë tha se skandali qe përfaqësues për qeverinë e re.
“Medalja e turpit i takon [kryeministrit] Edi Rama dhe sistemit që ai ka ndërtuar,” tha Lulzim Basha, kryetari i PD-së.
Të dielën, Rama dha një mesazh në Twitter duke thënë se kishte anuluar anëtarësinë e të akuzuarit në Partinë Socialiste ndërsa u ankua se Partia Demokratike po bënte politikë me skandalin.
Gjithsesi disa kritikë u ankuan për faktin se kryeministri shqiptar reagoi vetëm pas 24 orësh nga skandali.
