Armatimet kroate dhuruar qeverisë së Shteteve të Bashkuara mund të përfundojnë në duart e forcave irakene apo trupave kurde që po luftojnë kryengritësit e Shtetit Islamik, bën të ditur në mënyrë të tërthortë Zagrebi
Kryeministri i Kroacisë Zoran Milanovic tha të premten se qeveria e Irakut i ka dhënë një sasi armatimesh dhe municionesh autoriteteve amerikane pasi Uashingtoni i bëri thirrje anëtarëve të NATO-s të bëjnë dhurata ushtarake për të ndihmuar në konfliktet në Irak dhe Siri.
Milanovic refuzoi të konfirmojë se armatimet kishin për destinacion forcat irakene apo ato kurde, por tha se nuk kishte kundërshtim që SHBA-të t’i përdorin ato për të armatosur trupat që po luftojnë kryengritësit e Shtetit Islamik.
“Nëse [Shtetet e Bashkuara] do të ndihmojnë me [këto armatime] për të luftuar për demokracinë dhe kundër përjashtimit dhe fondamentalistëve… atëhere për mua kjo është e pranueshme,” tha ai.
Milanovic tha se i takonte Kroacisë si vend anëtar i NATO-s të marrë përgjegjësi në përpjekjet për të mposhtur Shtetin Islamik.
“Ajo që po ndodh në Irak duhet të ndalohet,” tha ai.
Por ai shtoi se në krahasim me vendet e tjera që po dhurojnë armë, Kroacia ka dhënë “sasi të vogla”.
I pyetur mbi mundësinë e kërcënimeve terroriste që mund të shfaqen nga ndonjë përzjerje në konfliktet e Sirisë dhe Irakut, Milanovic u përgjigj se Kroacia duhet të luajë rolin e vet si anëtar i NATO-s.
“Ne jemi një vend i vogël dhe modern, anëtar i BE-së dhe NATO-s, gjë që sjell disa detyrime të caktuara dhe situata të pakëndshme,” tha ai.
