Gati 300 oficerë policie, përfshirë forca të njësive speciale të ministrisë së brendshme dhe të ndihmuara nga helikopterë të ushtrisë kanë sulmuar zonën malore të Dukagjinit në veri të Shqipërisë, duke shkatërruar qindra bimë kanabisi.
“Operacioni u krye në një terren të thyer malor, nëpër lugina, gryka dhe zona me vegjetacion të dendur si dhe larg zonave të banuara, gjë që e bën aksesin shumë të vështirë,” bëri të ditur zëdhënësi i policisë Tefik Sulejmani në një deklaratë.
Të premten, njerëz të dyshuar si trafikantë droge hapën zjarr ndaj një helikopteri të ushtrisë me pushtë automatike kur forcat policore hynë në zonë.
Ky është operacioni i dytë madhor kundër drogës në Shqipëri këtë verë që synon të shkatërrojë plantacionet e kanabisit.
Në qershor, mbi 1 mijë policë morën nën kontroll fshatin e Lazaratit në Shqipërinë e jugut pas një jave betejash me kultivues të armatosur droge.
Ky fshat pati qenë një zonë jashtë kontrollit të policisë për më shumë se një dekadë dhe qe bërë sinonim me krimin.
Një oficer policie dhe dy barinj u plagosën gjatë këtij operacioni dhe 21 të dyshuar përfshirë edhe të akuzuarit si baronë droge që patën hapur zjarr ndaj policisë u arrestuan.
Policia shkatërroi pesë laboratorë droge dhe kapi sasi të mëdha armësh, përfshirë granatahedhës, një mitraloz kundërajror, disa mitralozë, eksplozivë, granata dhe qindra automatikë AK-47.
Në total 133,219 bimë kanabisi u shkatërruan.
Në një deklaratë të publikuar në Facebook të dielën, ministri i brendshëm Saimir Tahiri tha se që nga 1 qershori policia ka shkatërruar mbi 344,400 bimë.
“Ky operacion në zonën e Dukagjinit është një tregues i vendosmërisë sonë për të luftuar krimin e organizuar dhe trafikun e drogës,” tha Tahiri.
[cincopa AgHA667NBOXH]