Para takimit me kancelaren e Gjermanisë Angela Merkel në Berlin, udhëheqësit e Shqipërisë, Bosnjës, Kroacisë dhe Malit të Zi ranë dakord që një autostradë veri –jug përgjatë bregdetit perëndimor të Ballkanit të jetë projekt prioritar për ta.
Udhëheqësit e Ballkanit pritet të zhvillojnë një takim të rëndësishëm në Berlin të enjten, kryeministrat e Shqipërisë, Kroacisë, Bosnjës dhe Malit të Zi u takuan të hënën në Cavtat, Kroaci, për të diskutuar planet për ndërtimin e një autostrade veri – jug, të njohur edhe si autostrada Adriatiko-Joniane.
Autostrada duhet të lidhë Europën Qendrore dhe Perëndimore me Greqinë përmes Ballkanit Perëndimor përgjatë bregut të detit.
Kryeministri i Shqipërisë Edi Rama zhvilloi një takim të shkurtër me kryeministrin e Kroacisë Zoran Milanovic, me udhëheqësin e Malit të Zi, Mile Gjukanoviç dhe presidentin e Këshillit të Ministrave të Bosnjës Vjekoslav Bevanda.
Udhëheqësit rajonalë ranë dakord se autostrada, e cila do të kërkojë financime të huaja, është prioritet që do të ndihmojë të gjitha ekonomitë.
Milanovic tha se autostrada do të ndihmojë gjithashtu Kosovën, e cila nuk qe e pranishme në rakim.
“Nëse kjo rrugë ndërtohet dhe shkon deri në Shqipëri, miliona makina do të kalojnë përmes Kroacisë,: tha Milanoviç, duke theksuar përfitimin ekonomik të vendit të tij.
Duke folur për lidhjet e qytetit të Dubrovnikut me pjesën tjetër të Kroacisë, Milanoviç vërejti se autostrada do të arrijë Dubrovnikun përmes Bosnjës dhe Herzegovinës.
Duke nënvijëzuar se Milanoviç ka ofruar gjithashtu ndihmë për vendet fqinje në bisedimet e tyre me Bashkimin Europian, Gjukanoviç i Malit të Zi falënderoi mikpritësin për nxitjen e bashkëpunimit rajonal.
“Korridori Adriatiko-Jonian është shumë i rëndësishëm dhe prioritet për zhvillimin e rajonit tonë,” tha Gjukanoviç.
Kryeministri Rama rishprehu pikëpamjen e Qeverisë shqiptare se është një kohë e re për Ballkanin dhe kjo kërkon edhe një perspektivë të re në bashkëpunim rajonal.
“100 vite më parë pikërisht në këtë rajon fillojë Lufta e Parë Botërore. Sot është koha e vitit të parë të një paqeje mes gjithë rajonit. Është viti i parë që rajoni e jeton pa asnjë konflikt. Por është një paqe shumë e madhe për shpatullat tona veç e veç, prandaj ne duhet të bëhemi të gjithë bashkë,” – u shpreh Kryeministri Rama.
Bevanda i Bosnjës lavdëroi takimin për ndërtimin e besimit dhe tha se qe i vlefshëm për të vendosur pika reference dhe prioritete para se të shkojnë në Berlin.
“Ky korridor është diçka e mirë për të gjithë ne, pasi na lidh ne me njëri-tjetrin, dhe do të na ndihmojë për të zhvilluar infrastrukturën e Bosnjës dhe Herzegovinës dhe ekonomisë sonë,” shtoi Bevanda.
Takimi pason një takim të mëparshëm në Cavtat dhe Dubrovnik të zhvilluar në mes të korrikut, kur presidentët e vendeve të Ballkanit Perëndimor krahas presidentëve të Sllovenisë, Serbisë, Maqedonisë dhe Kosovës u takuan për të diskutuar projektet e mundshme të përbashkëta.
Kancelarja e Gjermanisë Angela Merkel vizitoi shkurtimisht një nga këto takime informate duke premtuar një takim të mëvonë formal nën udhëheqësinë e Gjermanisë.
Të enjten, Merkel, krahas ministrit të Ekonomisë të Gjermanisë Sigmar Gabriel dhe Ministrit të Jashtëm Frank Walter Steinmeier, do të mikpresë kryeministrat, ministrat e ekonomisë dhe ministrat e jashtëm të Ballkanit në Berlin, ku do të diskutohen çështjet e pazgjidhura dhe mundësitë për projekte të përbashkëta.
