Zgjedhje të parakohshme mund të zhvillohen në Kosovë pasi Gjykata Kushtetuese anuloi zgjedhjen e një kryeparlamentari nga rradhët e opozitës
Kosova mund të duhet të zhvillojë zgjedhje të reja – vetëm tre muaj pas zgjedhjeve të fundit – pasi Gjykata Kushtetuese të premten pezulloi zgjedhjen e një kryeparlamentari nga rradhët e opozitës.
Gjykata tha se zgjedhja e Isa Mustafës më 17 korrik si kryeparlamentar qe “jokushtetuese për shkak se kandidimi nuk u krye nga grupimi më i madh parlamentar.”
Vendimi erdhi një ditë pasi dy blloqe të mëdha parlamentare paraqitën argumentet e tyre mbi pyetjen se kush kishte të drejtë të kandidonte një kryeparlamentar në seancën hapëse të parlamentit të ri të zhvilluar më 17 korrik.
Partia Demokratike e Kosovës, PDK, kundërshtoi zgjedhjen e Mustafës, pasi, zgjedhjet e përgjithshme e patën nxjerrë atë si partia me grupin më të madh parlamentar me 37 deputetë.
Në anën tjetër, një aleancë postzgjedhore e përbërë nga Lidhja Demokratike e Kosovës, LDK, Aleanca për Ardhmërinë e Kosovës, AAK dhe Nisma për Kosovën, pretenduan të drejtën për të kandiduar Mustafën për shkak se sëbashku disponojnë 47 deputetë.
Ndërsa PDK po feston një triumf të qartë, mbetet e pasigurtë nëse kjo parti mund të angazhojë 61 deputetë të nëvojshëm për të zgjedhur një kryeparlamentar tjetër.
Riza Smaka, një ekspert i ligjit kushtetues, i tha Balkan Insight më herët se “nëse gjykata vendos që vetëm PDK ka të drejtë të nominojë një kandidat, dhe nëse ky kandidat nuk merr vota të mjaftueshme [në parlament], vendi do të shkojë në zgjedhje të parakohshme”.
Partitë e bllokut të opozitës e kanë bërë të qartë se nuk do të votojnë për një kandidat të PDK-së si kryeparlamentar.
Ky bllok ka thënë gjithashtu se do të hyjë në zgjedhje si koalicion në rast se vendi shkon në zgjedhje të reja.
Zgjedhja e kryeparlamentarit është çështje urgjente sepse vetëm pas zgjedhjes së tij Parlamenti mund të vijojë me zgjedhjen e qeverisë së re.
Duke argumentuar çështjen e vet në gjykatë të enjten, PDK tha se blloku i opozitës nuk legjitimohej si grupim për shkak se ai u krijua si aleancë pas zgjedhjeve të përgjithshme, duke u prezantuar formalisht në seancën inauguruese të parlamentit të ri.
Arsim Bajrami, nga PDK, i tha gjykatës se seanca inauguruese e parlamentit, ku blloku u themelua, kishte natyrë teknike dhe ceremoniale; themelimi i grupimit parlamentar duhej të kryhej në një seancë tjetër.
Në anën tjetër, blloku argumentoi se grupi parlamentar mund të krijohet me gjashtë apo më shumë deputetë, për sa kohë ata kanë informuar presidencën e parlamentit.
