Partia Demokratike e Shqiptarëve PDSH, njoftoi se do të bojkotojë parlamentin pas një sherri me grushte që shpërtheu në sallë mes një deputeti të saj dhe një deputeti të rivalit politik Partia Bashkimi Demokratik për Integrim
Partia Demokratike e Shqiptarëve, PDSH kërcënoi se do të braktisë parlamentin e Maqedonisë në protestë pasi një nga deputetët e saj, Orhan Ibraimi, shkëmbeu grushte me deputetin Rexhail Ismaili, nga Bashkimi Demokratik për Integrim, PDI, parti në aleancë qeverisëse me kryeministrin Gruevski.
Shumë deputetë të tjerë morën pjesë në sherrin fizik.
Të dyja palët ia hodhën fajin njëra-tjetrës dhe asnjëra nuk pranoi të komentojë detaje mbi sherrin. Jozyrtarisht raportohet se sherri u parapri nga fyerjet verbale nga të dyja palët.
“Ne kërkojmë hetim penal kundër deputetëve të PDI,” deklaroi në një konferencë për shtyp deputeti i PDSH Imer Aliu duke këmbëngulur se qe PDI qe përgjegjëse për nisjen e sherrit.
Deputeti i BDI Artan Grubi tregoi një histori të ndryshme duke e cilësuar deputetin e PDSH si përgjegjës. Ai tha se kolegu i tij Ismaili ka kërkuar ndihmë mjekësore pas sherrit për shkak se i qe dëmtuar syri.
Beteja shpërtheu në një seansë në komisionin parlamentar që po shqyrtonte planin e qeverisë për të ribalancuar buxhetin. Në fjalimin e tij, Ibraimi akuzoi rivalët nga BDI se nuk po kujdeseshin për pjesën e banuar nga shqiptarët të Maqedonisë.
Për të mbështetur akuzën e tij, ai tha se fshati shqiptar i Lipkovës nuk kishte ende ujë të pijshëm edhe pse një liqen artificial pranë tij furnizon me ujë qytezën fqinje të Kumanovës.
Komentet duket se shkaktuan shkëmbimin e fyerjeve mes dy deputeteve pas të cilës të dy shihen në një video të publikuar nga 24 Vesti duke shkëmbyer grushte. Deputetë të tjerë u përpoqën t’i ndajnë, apo morën anë, duke i bërë gjërat më keq.
PDSH, e cila ka shtatë nga 123 vendet e parlamentit, është në praktikë partia e vetme opozitare pjesëmarrëse. Blloku kryesor i opozitës, i udhëhequr nga socialdemokratët, SDMS, refuzoi të hyjë në parlament pasi akuzoi koalicionin qeverisës se kishte manipuluar zgjedhjet e prillit.
Përplasjet mes deputetëve duke përdorur grushte nuk janë të pazakonta në parlamentin e Maqedonisë.
Incidenti më serioz ndodhi më 24 dhjetor 2012, kur partitë në pushtet miratuan buxhetin për vitin 2013 brenda pak minutash pasi deputetët e opozitës u nxorrën nga salla me dhunë nga policia.
Kjo shkaktoi një krizë të gjatë politike që u zgjidh në fund me marrëveshje për hartimin e një raporti të përbashkët mbi ngjarjen.
