Shkrimtarët dhe të pasionuarit pas fjalës së shtypur do të festojnë sukseset më të fundit letrare në Festivalin e Letërsisë Botërore në Zagreb, Kroaci.
Shkrimtarët dhe adhuruesit e librave nga rajoni dhe më gjerë po udhëtojnë drejt Festivalit të Letërsisë Botërore, që starton më 4 shtator në Zagreb, Kroaci.
Për nëntë ditët e ardhshme ata do t’i bashkohen promovimeve të librave, diskutimeve me autorët dhe mbledhjeve të artit.
Më shumë se 30 shkrimtarë të mirënjohur nga rajoni dhe nga e gjithë bota do të marrin pjesë në festival.
Një nga yjet është shkrimtarja italiane Francesca Melandri, autore e librit “Eva fle”, një dramë politike e vendosur në shekullin e 20 në Tirolin Jugor në Itali. Melandri do të prezatojë në festival librin e saj më të ri, “Më i lartë se Deti”.
Javier Cercas, një autor spanjoll, do të jetë pjesë e panelit që do prezantojë veprat e reja dhe më të fundit. Ai është i njohur për shkrimet rreth të shkuarës së trazuar të Spanjës, i përqendruar më tepër te Lufta Civile Spanjolle dhe te regjimi i Gjeneralit Franko.
Një tjetër shkrimtar i interesuar në temat historike, Lawrence Norfolk nga Britania, do të jetë i pranishëm në festival, për të folur për librin e tij “Banketi i John Sturnall”, një rrëfim historik për një jetim i cili bëhet një kuzhinier i shkëlqyer, libër që është pritur shumë mirë.
Një tjetër i ftuar ndërkombëtar është izraeliti Sami Michael, një autor që shkruan për aspiratat e hebrenjve dhe palestinezëve në Lindjen e Mesme. Michael është gjithashtu president i Lidhjes për të Drejtat Civile në Izrael.
Panele shtesë do të diskutojnë tema si “lufta dhe kujtimet”, “politika dhe letërsia” dhe “intelektualët në Luftën e Parë Botërore”.
Do të mbahet edhe një trajtim arti në të cilin piktorët e rinj mund të pikturojnë pjesëmarrësit dhe më pas punimet do të nxirren në një ekspozitë.
Festivali është organizuar nga Sibila dhe Seid Serdarevic, pronarë të shtëpisë botuese, Fraktura. Vendi ku do të mbahet festivali do të jetë një bibliotekë dhe një kinema në Zagreb.
