Maqedonia thotë se skema e saj për t’i bërë kompanitë e shërbimeve të fshijnë borxhet e klientëve të varfër ka qenë e suksesshme dhe ministrat në Kroaci tani po ndërmarrin një iniciativë të ngjashme.
“Interesi është vërtetë i lartë dhe ne presim të kemi aplikime akoma më të mëdha deri në 12 tetor, afati i fundit për bërjen e aplikimit. Kjo nënkupton se pritshmëria jonë për përgjigje masive do të përmbushet,” tha Stavreski.
Muajin e shkuar qeveria i bëri thirrje bankave dhe kompanive të shërbimeve t’i bashkoheshin skemës për shuarje të borxheve të klientëve të varfër. Në këmbim, qeveria do t’i ofronte kompanive ndërprerje të taksave vjetore.
Autoritetet shpresojnë se më shumë se 100 mijë njerëz, përfshirë edhe të papunët, të burgosurit, ata që janë në asistencë sociale, nënat e vetme dhe të tjerë të përfitojnë nga skema.
Përgjigje pozitive është marrë nga të gjitha bankat në vend, furnizuesi me energji EVN Macedonia, kompania e ngrohjes Toplifikacija, kompania shtetërore e energjisë ELEM dhe Radio-Televizioni maqedonas, po ashtu edhe nga organet që përfaqësojnë përmbaruesit dhe noterët.
“Kjo tregon përgjegjësinë e tyre të lartë sociale dhe unë shpresoj që së bashku të jemi në gjendje të ndihmojmë shumë njerëz,” tha Stavreski.
Autoritetet kroate po zgjerojnë idenë e shuarjes së borxheve për më të varfrit në vend.
Javën e shkuar, Ministri kroat e Financave Boris Lalovac dhe Ministrja e Politikës Sociale Milanka Opacic takuan përfaqësuesit e bankave komerciale kroate dhe operatorët më të mëdhenj të telekomunikimit në vend, Telekom-in kroat dhe Vip për të diskutuar idenë.
Ministrat po përpiqen të bindin bankat dhe operatorët të shuajnë borxhet e njerëzve të varfër të cilët kanë detyrime më shumë se 1300 euro. Ministrat kanë sugjeruar se mund të jenë rreth 140 mijë njerëz në këtë kategori.
Njerëzit me llogari bankare kursimesh, shtëpi pushimesh, dy ose më shumë apartamente apo makina dhe varka nuk do të pranohen, thanë ministrat.
Shuarja e borxhit në Maqedoni ishte një prej premtimeve elektorale të partisë VMRO DPMNE të Kryeministrit Nikola Gruevski gjatë zgjedhjeve të përgjithshme të prillit, të cilat i fitoi. Masa është propozuar si një mënyrë për të ndihmuar njerëzit të kalojnë efektet e krizës ekonomike globale.
Por disa ekspertë ekonomie thonë se skema mund të shihet edhe si një presion mbi ekonominë në kohën kur qeveria nuk është në gjendje të ofrojnë asistencë sociale nga buxheti i shtetit.
“Kjo shkatërron principet në ekonominë e tregut dhe sistemin ligjor. Ka mënyra të tjera për të ofrua politika sociale. Kjo do të thotë të gënjesh popullin me qëllim propagandistik,” tha ish-Ministri i Financave Dzevdet Hajredini për Radion Europa e Lirë muajin e shkuar.
