Dikur vendi i parë ateist në botë, Shqipëria sot është kthyer në një model të bashkëjetesës fetare që bota mbarë duhet ta ndjekë, nënvizoi Papa Françesk gjatë vizitës së tij në Tiranë.
“Toleranca fetare është një pasuri që duhet ta ruani mirë, një e mirë e çmuar dhe meriton një vëmendje të veçantë në këto kohë kur ekstremizmi po minon bashkëjetesën fetare, duke u kthyer në rrezik për dhunë,” tha Papa Françesk gjatë fjalimit të tij në Presidencë.
“Askush nuk duhet të mendojë se mund ta përdorë forcën e Zotit për akte të dhunshme,” shtoi ai.
Megjithëse Shqipëria është një vend me shumicë myslimane, ne kemi një traditë të gjatë të bashkëjetesës fetare mes njerëzve të besimeve të ndryshme.
Sipas censusit të vitit 2011, 56.7 për qind e shqiptarëve e përcaktojnë veten si myslimanë, 2.09 për qind e quajnë veten Bektashi, 10.53 për qind janë Katolikë dhe 6.75 për qind janë Ortodoksë Kristianë. Rreth 2.5 për qind e përkufizojnë veten si ateistë dhe 5.53 për qind janë besimtarë pa religjion.
Për gati gjysmë shekulli, nën regjimin brutal të diktatorit stalinist Enver Hoxha, Shqipëria qe vendi më i izoluar në Europë, i krahasueshëm sot me Korenë e Veriut.
Më 1967, Hoxha e deklaroi Shqipërinë vendi i parë ateist në botë, duke nisur një fushatë të re përndjekjeje kundër të gjitha religjioneve dhe në veçanti kundër Kishës Katolike, tradicionalisht e fuqishme në veri të vendit.
Papa Françesku arriti të dielën në mëngjes në Shqipëri, për një vizitë njëditore dhe pas takimit me Presidentin Bujar Nishani, mbajti një meshë përpara mijëra pelegrinëve, myslimanë dhe të krishterë, në sheshin Nënë Tereza në Tiranë.
Në përmbyllje të meshës Papa Françesk iu drejtuar me një mesazh të rinjve Shqiptarë.
“Ju jeni gjenerata e re e Shqipërisë, i thoni jo idiolatrisë së parasë nën shembullin e martirëve tuaj,” tha ai. “Ju ftoj ta ndërtoni jetën mbi Jezu Krishtin, sepse kush ndërton mbi Krishtin ndërton mbi shkëmb,” shtoi Papa Françesk.
Sipas zëdhënësit të Vatikanit Federico Lombardi në një konferencë për shtyp ai deklaroi që sipas organizatorëve rreth gati 300 mijë pelegrinë kishin zbritur në rrugët e Tiranës për të mirëpritur Papën Françesk.
Lombardi tha se Papa Françesk vuri re që Shqipëria ka një “popullatë te re, që sheh drejt të ardhmes me shpresë.”
Sipas Lombardit, në pallatin presidencial Papa Françesk u ul dhe shkroi: “Popullit fisnik shqiptar, respekt dhe admirimin.”
“Presidenti ishte shumë i prekur dhe i emocionuar,” shtoi ai.
Pas meshës së shenjtë në shesh, Papa Françesku pati një takim me ministrin e brendshëm Saimir Tahiri, të cilin e inkurajoi për të thelluar luftën kundër drogës dhe më vonë u takua më liderët e komuniteteve fetare në Shqipëri.
Gjatë meshës mbrëmësore në Katedralen e Shën Palit, Papa Françesk dëgjoj dëshmitë e dy meshtarëve katolikë dhe një motre, të cilët kishin vuajtur në burgjet e regjimit komunist.
Nën tingujt e kambanores së katedrales, Papa Françesk u larguar nga Tirana në drejtim të fshatit Bubq të Fushë Krujës, ku vizitoi qendrën bamirëse për fëmijë, Betania; ndalesa e tij e fundit në tokën Shqiptare.