Instalimi i paautorizuar i kryqit në një kodër mbi qytetin me shumicë myslimane të pushtuar nga forcat serbe në kohën e luftës, shkaktoi zemërim, e raportet tregojnë se disa njerëz po përpiqen ta rrëzojnë.
Policia në Lindje të Sarajevës tha të hënën se pesë njerëz janë shoqëruar në komisariat për t’u marrë në pyetje mbi planifikimin për të rrëzuar kryqin e bardhë prej 10 metrash që u ngrit në fundjavë nga ish të burgosurit serbë të Bosnjës të kampit të izolimit.
Kryqi shkaktoi zemërim sepse u instalua në Zlatiste, një zonë mbi malin Trebovic, nga ku serbët hodhën predha në kryeqytetin e Bosnjës gjatë luftës 1992-95. Platiste është tani nën kontrollin e entitetit të serbëve të Bosnjës, Republikës Srpska.
Kryebashkiaku i Sarajevës, Ivo Komsic, tha se kryqi, i cili u instalua nga Bashkimi i të Burgosurve të Kampit të Republikës Srpska gjatë natës mes të shtunës dhe të dielës, ishte një fyerje për ata që kanë vuajtur gjatë luftës.
“Kjo fyen viktimat e Sarajevës, por gjithashtu edhe serbët që u vranë në luftë,” tha Komsic, duke i nxitur vendasit t’i rezistojnë provokimit.
Ai fajësoi presidentin e Republikës Srpska, Milorad Dodik, për instalimin e kryqit, duke pretenduar se ishte një përpjekje për të rindezur kujtimet përpara zgjedhjeve parlamentare muajin e ardhshëm.
“Monumenti-kryq mbi Zlatiste është një provokim i qartë parazgjedhor nga Milorad Dodik, që, jam i sigurt, do të largohet pas zgjedhjeve të tetorit,” tha ai.
Organizatat serbe kanë biseduar rreth vendosjet së kryqit në atë vend për disa vite, duke planifikuar një strukturë 26 metra të gjatë si monument për më shumë se 6600 serbët që vdiqën në dhe rreth Sarajevës gjatë luftës.
Por ideja nuk u përmbyll kurrë për shkak të ndjeshmërisë së qytetarëve të Sarajevës, të cilët i mbijetuan pushtimit katër-vjeçar të qytetit.
Zëvendës presidenti i entitetit të Federatës së Bosnjës, Svetozar Pudaric, i cili është një serb etnik, tha se kryqi kishte qëllim të provokonte.
“Ka si qëllim vetëm të shkaktojë një reagim negativ rreth ‘atyre’, ‘të tjerëve’, tha Pudaric.
Ai tha se ishte bërë në një mënyrë sekrete dhe të burracake gjatë natës.
Disa dhjetëra persona mbajtën një protestë të shkurtër paqësore në Sarajevë të dielën kundër vendosjes së kryqit.
Zyra e Përfaqësuesve të Lartë, kontrollore ndërkombëtare e Marrëveshjes Dayton të Paqes, që i dha fund luftës, gjithashtu paralajmëroi se kryqi do të nxisë trazira etnike.
“Siç ka theksuar OHR disa herë, simbolet fetare nuk duhet të përdoren për të nxitur tensione ndër-etnike,” tha zëdhënësi i OHR, Eldar Subasic të dielën.
“Autoritetet e Republikës Srpska duhet të ndërmarrin masa menjëherë në mënyrë që të sigurojnë një mjedis të sigurt dhe të drejtuar nga ligji,” tha Subasic, sipas agjencisë së lajmeve Klix.
Ndërkohë, disa politikanë, përfshirë partitë opozitare serbe nga Republika Srpska, akuzuan Dodik për përgjegjësi direkte të incidentit, që sipas tyre po përpiqet të rrisë ndjeshmërinë e fushatës së tij zgjedhore.
