Prokuroria kërkoi burg të përjetshëm për Karaxhixh ndërkohë që filluan argumentet përmbyllëse në gjyqin e krimeve të luftës së ish-liderit politik serb të Bosnjës në Gjykatën e Hagës.
Filluan të hënën argumentet përmbyllëse në gjykatën e OKB-së në Holandë në gjyqin e Karaxhixh i cili akuzohet si përgjegjës i disa prej mizorive më të këqija që ka parë Europa që prej Luftës së Dytë Botërore.
Në fillim të argumenteve përmbyllëse, prokurori Alan Tieger e quajti Karaxhixhin një gënjeshtar dhe një kriminel me të shkuar gjenocidi i cili është përgjegjës për spastrime etnike ndaj popullatës joserbe në Bosnje.
“Qindra dëshmitarë dhe prova konfirmojnë politikën e spastrimit etnik, në të cilin Karaxhixh ishte lideri,” tha Tieger në gjykatë.
Prokurori përshkroi shembuj individual të vuajtjes, dhe foli për njerëz që ishin qëlluar nga snajperët në Sarajevë, ishin ekzekutuar në Srebrenicë dhe vrarë në kampet e burgosjes serbe të Bosnjës në Prijedor, duke thënë se ato ishin shembuj të një sipërmarrje kriminale të përbashkët në të cilën Karaxhixh ishte i përfshirë, dhe që kishte si qëllim të eliminonte boshnjakët me synimin e krijimit të një shteti serb.
Karaxhixh akuzohet se ka ideuar gjenocidin në Srebrenicë në 1995 dhe në shtatë komuna të tjera në 1992, persekutim të jo-serbëve, terrorizim të popullatës së Sarajevës dhe pengmarrje të paqeruajtësve të OKB-së.
“Nën komandën dhe mbikëqyrjen e vartësve të Karaxhixh dhe të atyre që bashkëpunuan, ata dëbuan, vranë, torturuan dhe keqtrajtuan qindra mijëra myslimanë dhe kroatë,” tha prokuroria në Gjykatën e Hagës të premten.
Prokuroria tha se po kërkonte dënim të përjetshëm për shkak se shkalla dhe shtrirja e “fushatave kriminale” të udhëhequra nga Karaxhixh ishte e madhe.
Por këshilluesi ligjor i presidentit serb të Bosnjës në kohë lufte, Peter Robinson, tha për BIRN se Karaxhixh kishte shpresë se do të shpallej i pafajshëm.
“Ai pret, është optimist dhe thotë se nëse kjo është një gjykatë e vërtetë, ai do të lirohet, megjithatë, ai nuk është i sigurt se kjo është një gjykatë e vërtetë sipas përkufizimit të tij ndaj ai mund edhe të zhgënjehet,” tha ai.
Ish-lideri serb i Bosnjës, i cili punonte si psikiatër dhe shkroi disa vëllime poezish përpara se të hynte në politikë në 1980, është i vendosur t’i kthehet shkrimit kur gjyqi të mbarojë, shpjegoi këshilltari i tij ligjor.
“Ai pret të ndërmarrë disa veprimtari të lidhura me letërsinë në vend të aktivitetit legal. Ai më tha se procesi ligjor ia kishte marrë të gjithë kreativitetin, ai po pret të fillojë punë krijuese,” tha Robinson.
Pas argumenteve përmbyllëse, vendimi pritet të jepet në verën e vitit 2015.