Një studim i ri tregon se municionet që përdoren nga luftëtarët e Shtetit Islamik në konfliktet e Sirisë dhe Irakut kanë prejardhjen kryesisht nga Kina, Bashkimi Sovjetik, Shtetet e Bashkuara dhe Serbia.
Sipas një raporti të publikuar nga grupi studimor i Kërkimi mbi Armatimet e Konflikteve (Conflict Armament Research), Serbia është vendi i pestë më i madh si burim origjine i municioneve të përdorura nga Shteti Islamik, pas Kinës, Bashkimit Sovjetik, Shteteve të Bashkuara dhe Rusisë.
Kërkimi mbi Armatimet e Konflikteve thotë se ka dokumentuar të gjitha municionet e përdorura nga Shteti Islamik, viti i prodhimit të të cilave varion nga 1945 deri në 2014.
“Dy periudha prodhimi, ajo e viteve 1970-80 dhe ajo e viteve 2000, janë ato që regjistrohen më shpesh në kampionin e studiuar dhe kryesisht përbëhen nga municione të fabrikuara në Kinë, Serbi, Bashkimi Sovjetik/Federata Ruse dhe Shtetet e Bashkuara,” thotë raporti.
Nga 1,730 lloje municionesh të analizuara, 142 ishin prodhuar në Serbi, krahasuar me 445 të prodhuar në Kinë, 338 në Bashkimin Sovjetik, 323 në Shtetet e Bashkuara dhe 154 në Federatën Ruse.
Për sa i përket municioneve të prodhuar pas vitit 2010, Serbia është klasifikuar e katërta ndër vendet e origjinës, pas Bullgarisë, Kinës dhe Turqisë.
Municionet e prodhuara së fundmi janë fabrikuar në fabrikën shtetërore Prvi Partizan në qytetin Uzice.
Prvi Partizan prodhon municione që nga viti 1986 dhe ka furnizuar Ushtrinë Serbe, policinë, si dhe ushtritë e shumë vendeve të tjera. Ajo gjithashtu prodhon municione për sport ose gjueti të cilat shiten në mbarë botën.
Gjetjet e raportit vijnë në rrjedhën e një serie investigimesh të Kërkimi mbi Armatimet e Konflikteve në rajonet kurde në veri të Sirisë dhe Irakut, gjatë muajve Korrik-Gusht.
Në Siri, grupi investigues punoi në krah të Njësive të Mbrojtjes së Popullatës Kurde për të dokumentuar municionet e mbledhura gjatë sulmeve kundër forcave të ISIS, kryesisht afër qyteteve Kobani dhe Serekani.
Në Irak, grupi punoi në bashkëpunim me forcat Peshmerga, besnike të qeverisë lokale të kurdëve, për të dokumentuar gëzhojat e gjetura në pikat e sulmit e ISIS.
Në gusht, Shqipëria dhe Kroacia deklaruan se do fillojnë transferimin e sasive të mëdha të armatimeve dhe municioneve te forcat kurde të Irakut për t’i ndihmuar në avancimin e tyre kundër militantëve të Shtetit Islamik.
