Baza më e re e Shteteve të Bashkuara në Europë do të jetë në Deveselu dhe do të bëjë pjesë në mbrojtjen antiraketore të NATO-s. Ajo konsiderohet si një nga të paktat ‘ekspansione ushtarake amerikane në Europë’
Marina e Shteteve të Bashkuara do të komisionojë formalisht ndërtimin e një baze të re raketash në Rumaninë e jugut këtë javë, bëhet e ditur nga media amerikane.
Baza në Deveselu është një nga dy interceptorët tokësorë të Europës për mbrojtjen antiraketore të NATO-s, një skemë që shikohet me shumë dyshime nga Rusia.
“Baza përfaqëson një ekspansion të rrallë të shtrirjes së Shteteve të Bashkuara në Europë dhe akoma më të rrallë sa i përket ndërtimit të një baze detare nga themelet,” vëren gazeta ushtarake amerikane Stars and Stripes.
Baza në Deveselu do të jetë e para që do të mbajë sistemin raketor balistik Aegis Ashore, një version me bazë tokësore të sistemit të gjurmimit raketor që është instaluar në të gjitha anijet luftarake amerikane që nga viti 2004.
Baza pritet të bëhet operacionale deri në fund të vitit 2015 dhe do të ketë 200 deri në 500 trupa amerikane. Baza e dytë e këtij lloji, e cila do të vendoset në Poloni, pritet të bëhet operacionale nga viti 2018.
Puna në Deveselu përfshin një investim prej 400 milionë dollarësh. Vendi ironikisht është ndërtuar fillimisht si bazë Sovjetike në vitin 1952.
Rumania është një nga mbështetësit më të mëdhenj amerikanë mes ish-vendeve socialiste të Europës Lindore. Aeroporti Mihail Kogalniceanu, pranë Detit të Zi, u bë një bazë e rëndësishme ajrore amerikane në vitin 2007.