Ministria e Drejtësisë përdori fondet publike për të blerë në mënyrë të paligjshme bileta VIP për ndeshjen mes Shqipërisë dhe Danimarkës e luajtur më 11 tetor në Elbasan.
Të dhënat e transaksioneve të thesarit të publikuara nga Open Data Albania, tregojnë se Ministria e Drejtësisë i pagoi 36 mijë lekë Federatës Shqiptare të Futbollit më 8 tetor për bileta futbolli.
Megjithëse transaksioni është e listuar nga ministria si “shpenzim për pjesëmarrje në konferenca” përshkrimi i faturës thotë se pagesa u bë për ‘bileta.’
Shqipëria luajti kundër Danimarkës më 11 tetor në Elbasan Arena dhe ndeshja përfundoi në barazim 1:1. Kjo qe ndeshja e dytë e kombëtares për fazën kualifikuese të Euro 2016
Pyetur nga BIRN, ministria e Drejtësisë pranoi se ka paguar për dy bileta për ndeshjen, por tha se paratë do t’u mbahen dy punonjësve nga pagat e këtij muaji.
“Sqarojmë se sektori i financës në Ministrinë e Drejtësisë ka reflektuar (zbritur) këtë shumë në borderonë e pagave të muajit tetor 2014 për 2 punonjës të institucionit të cilët kanë kërkuar të bëhet rezervimi,” tha ministria në një deklaratë.
Megjithëse ministria thotë se vetëm dy bileta u blenë, është e paqartë se pse ajo i transferoi Federatës Shqiptare të Futbollit 36 mijë lekë. Sipas Federatës, biletat më të shtrenjta në këtë ndeshje, në tribunën e vogël VIP, kushtonin 10 mijë lekë secila.
Ministria nuk tha se cilët qenë zyrtarët që panë ndeshjen në Elbasan Arena më 11 tetor. Gjithsesi, Ministri i Drejtësisë Nasip Naco u fotografua në tribunën VIP gjatë ndeshjes.
Megjithëse shuma e parave është e vogël, sipas kodit penal shqiptar, përdorimi i fondeve publike nga zyrtarët për qëllime private konsiderohet shpërdorim detyre dhe sipas nenit 256 ndëshkohet me deri shtatë vjet burg dhe një gjobë.
