Rreth 20 huliganë shkaktuan trazira mbrëmjen e të enjtes në qendrën e LGBT në Shkup, ku komuniteti gej po festonte përvjetorin.
Rreth 20 huliganë të maskuar u përpoqën të hyjnë me forcë në festën e dy-vjetorit të qendrës për mbështetjen e komunitetit LGBT, të enjten në Shkup, duke shkaktuar dëme të shumta në kafenenë “Damar” në zonën e Pazarit të Vjetër, ku ndodhi aktiviteti.
Një grua u plagos pasi huliganët i hodhën një shishe në kokë.
Dëshmitarët thanë se sulmi ka zgjatur vetëm rreth 10 minuta, por pati efekte shkatërruese.
“Huliganët hynë në kafe dhe filluan të hedhin çdo gjë, si shishe, arka… Ishte një rrëmujë e madhe. Një vajzë u plagos dhe u dërgua në urgjencë. Ajo është mirë, por ende po shërohet,” tha Uranija Pirovska, drejtore e Komitetit të Helsinkit për të Drejtat e Njeriut në Maqedoni, organizatorja e aktivitetit.
Viktimat e sulmit homofobik thanë se nuk mundën të dallonin fytyrat e huliganëve, sepse ata kishin veshur maska.
“Ata ishin të organizuar mirë. Kishin një plan të saktë se si të hynin, çfarë të shkatërronin dhe kur të largoheshin, para se të vinte policia,” tha një dëshmitar.
Ky nuk është sulmi i parë ndaj qendrës së LGBT në Shkup. Më 24 tetor 2012, kur ajo u hap për herë të parë, ndërtesa u sulmua dhe dritaret u thyen.
Vitin e kaluar, një polic u plagos pasi 10 huliganë të maskuar hodhën gurë dhe shishe drejt ndërtesën.
Qendra mbështetet financiarisht nga Ambasada Hollandeze. Ambasadorja hollandeze në largim, Marriet Schuurman, në një intervistë për BIRN-in të martën, ka shprehur shqetësime të thella lidhur me sundimin e ligjit në vend.
Dështimi i autoriteteve për të reaguar ndaj dhunës “krijon perceptimin se ajo është sponsorizuar, ose tolerohet në rastin më të mirë, nga qeveria dhe përdoret si një instrument për të frikësuar njerëzit dhe për t’u mbyllur gojën,” tha ajo.
Pirovska përsëriti të njëjtën akuzë lidhur me bashkëpunimin zyrtar gjatë intervistës për BIRN.
“Unë do të takohem me përfaqësuesit e delegacionit të BE-së në Shkup dhe me të gjithë ambasadorët. Sulmuesit përgjegjës për ngjarjet e mëparshme nuk janë gjetur – dhe kjo do të thotë se institucionet e tolerojnë dhunën,” tha ajo.
“Në Maqedoni, të drejtat themelore të komunitetit LGBT nuk kanë asnjë vlerë. E drejta e tyre për të jetuar është e rrezikuar,” shtoi Pirovska.