Ministrat e Malit të Zi kanë refuzuar të mbështesin nismën për legalizimin e marihuanës për përdorim mjekësor, duke thënë se çdo vendim i tillë duhet të paraprihet nga analiza më të thella mjekësore dhe ligjore.
Të enjten, ministrat e Malit të Zi vendosën kundër një ndryshimi të propozuar në ligjin për parandalimin e abuzimit të drogave, e cila do të kishte lejuar përdorim mjekësor të marihuanës në rrethana të caktuara.
Projekt-ligji i paraqitur nga Partia Liberale, një partner në koalicionin qeverisës të Milo Gjukanoviçit, argumentonte se marihuana është provuar të ketë efekte pozitive në trajtimin e një sërë konditash shëndetësore.
Mbështetësit e përdorimit të ligjshëm të bimës thonë se efektet e saj pozitive janë testuar në trajtimin e sklerozës së shumëfishtë dhe Aids. Besohet gjithashtu se ajo është efikase në lehtësimin e dhimbjeve si efekt anësor i kimioterapisë.
Megjithatë, kabineti tha se duhet bërë një analizë më e thellë ligjore dhe shkencore para se qeveria t’i japë dritën e gjelbër këtij propozimi të debatueshëm.
“Përdorimi i preparateve me bazë marihuanën për qëllime terapeutike kërkon ndryshime më të gjera në kuadrin ligjor ekzistues në konsultim me ekspertët,” u shpreh kabineti.
Ministri i shëndetësisë, Miodrag Radunoviç, tha në shtator se ai ishte i hapur për idenë e lejimit të përdorimit të kanabis për qëllime mjekësore.
Radunoviç tha se ai do të mbështeste një zgjidhje ligjore që do të mundësonte përdorimin e marihuanës për pakësimin e dhimbjeve.
Legalizimi i kanabisit për qëllime mjekësore ka qenë një çështje e debatuar gjatë muajve të fundit dhe në vende të tjera të rajonit, si Kroacia dhe Serbia, por pa rezultate konkrete deri më tani.
Disa shtete amerikane dhe vende evropiane – të tilla si Hollanda – i lejojnë pacientët të konsumojnë kanabis bazuar në recetën e mjekut.
