Rreth 70 familje që po preken nga ndërtimi i Unazës së Madhe të Tiranës në segmentin nga Komuna e Parisit deri te Fabrika e Bukës kërkojnë të trajtohen si të pastrehë nga qeveria.
Me pankarta ku shkruhej “kam shtëpi dhe jo barrakë” si dhe me thirrjet “Dua Shtëpi”, disa dhjetëra banorë të zonës së njohur si Selita në Tiranë protestuan të hënën (27 tetor 2014) para Ministrisë së Zhvillimit Urban dhe Turizmit si dhe Bashkisë së Tiranës duke kërkuar të dëmshpërblehen për dëmet që po pësojnë.
Sipas organizatorëve të protestës, rreth 70 familje, shumica e të cilave i përkasin komunitetit rom, rrezikojnë të mbeten pa strehë si pasojë e planit të qeverisë për të shembur shtëpitë e tyre për t’i hapur vend autostradës së re të njohur si Unaza e Madhe e Tiranës, një projekt që synon të devijojë trafikun interurban drejt Elbasanit nga qendra e Tiranës.
Në këtë zonë preken tri lloje banesash: banesa për të cilat pronarët kanë certifikata pronësie dhe rrjedhimisht i nënshtrohen procesit të shpronësimit dhe kompensimit, banesa pronarët e të cilëve kanë aplikuar për procesin e legalizimit por që ky proces është pezulluar me arsyetimin se nuk mund të legalizohen objekte brenda një sipërfaqe gjeografike që do ti nënshtrohet planeve urbane si dhe disa objekte të cilat nuk klasifikohen si banesa nga ligji për Legalizimet.
Banorët e kësaj zone besojnë se përballen me diskriminim në raport me shqiptarët që kanë kryer ndërtime pa leje në të gjithë vendin dhe që në raste të tilla, shumë shpesh janë kompensuar për dëmet e pësuara.
Para Ministrisë së Zhvillimit Urban dhe Turizmit, një zyrtar i ministrisë doli për të folur me protestuesit ndërsa para Bashkisë së Tiranës, protestuesit takuan kryetarin e Bashkisë Lulzim Basha, i cili premtoi se do të dërgojë një punonjës të Bashkisë për të analizuar situatën në terren.