Agjencia ndërkombëtare e lajmeve ruse Russia Today do të hapë 29 zyra të reja jashtë vendit, përfshirë edhe një zyrë në Serbi duke argumentuar se do të promovojë në këtë mënyrë këndvështrimin e Kremlinit mbi botën.
Rusia sot (Rossiya Segodnya) njoftoi dje se Beogradi do të jetë një nga zyrat e reja që do të hapë nëpër botë dhe që do të shërbejë lajme në internet në gjuhën vendëse dhe radio që nga viti 2015.
Ljubinka Milincic, një ish korrespondente nga Moska e gazetës serbe Politika do të drejtojë zyrën e Beogradit ku pritet të punësohen 30 njerëz. Milincic i tha agjencisë së lajmeve BETA se faqja e internetit në serbisht do të raportojë lajmet nën perspektivën e politikës së jashtme të Rusisë.
“Ka nevojë për perspektivën e Rusisë këtu, për shkak se media perëndimore ka vepruar në vendin tonë që prej 20 vjetësh,” thotë Milincic.
“Pothuajse nuk ka fare shërbime mediatike serbe në Serbi dhe do të jetë gjë shumë e mirë të dëgjohet fjala e Rusisë; këndvështrimi i Rusisë mbi një situatë të saktuar,” shpjegoi ajo.
Lajme të pakonfirmuara thonë se Russia Today do të hapë edhe një zyrë në Rumani më 1 nëntor. Një faqe interneti me adresën russiatoday.ro është regjistruar ndërkohë nga gazetari Dan Musetoiu, ish redaktor i një televizioni të orientuar nga lajmet e biznesit në Bukuesht.
Musetoiu, i cili është gjithashtu themelues i një faqeje në Facebook të quajtur RT.ro, nuk qe i gatshëm të komentonte.
Nuk është e qartë nëse RT do të hapë zyra në vende të tjera të Ballkanit.
Agjencia e lajmeve Russia Today u krijua pas një dekreti të lëshuar nga presidenti i Rusisë Vladimir Putin në dhjetor 2013.
Ajo u krijua për të zëvendësuar agjencinë shtetërore të lajmeve RIA Novosti dhe shërbimin ndërkombëtar radiofonik të Rusisë Voice of Russia. Kjo radio ofron mes të tjerash edhe lajme në gjuhën shqipe në adresën http://albanian.ruvr.ru.
Sipas dekretit presidencial, mandati për agjencinë e lajmeve është që të “ofrojë informacion mbi politikat shtetërore të Rusisë dhe jetën e shoqërinë ruse për audiencën jashtë vendit”.
RIA Novosti deklaroi në atë kohë se “kjo është lëvizja e fundit në një seri veprimesh në panoramën e lajmeve të Rusisë, e cila sugjeron se tashmë do të ketë një kontroll më të ashpër shtetëror në median që sakaq qe shumë e kontrolluar”.
