Një prokurore speciale e misionit për sundimin e ligjit të Bashkimit Europian në Kosovë, EULEX, tha se një zyrtar i lartë mori rryfshet për të liruar një të dyshuar për krime të rënda.
Prokurorja speciale Maria Bamieh i tha BIRN se ajo zbuloi nga të dhënat e mbledhura përmes përgjimeve telefonike në rastet që ajo po hetonte se një zyrtar i lartë i EULEX mori ryshfet për të liruar të dyshuarit e akuzuar për vrasje dhe korrupsion.
Bamieh, një juriste britanike, tha se ajo vendosi të flasë publikisht në mënyrë që të shmangë çdo mundësi akuzash kundër saj. Ajo është pezulluar nga EULEX për shkakun se foli publikisht.
“Në këtë mënyrë unë desha të mbroj reputacionin tim duke folur publikisht dhe duke shpjeguar akuzat,” tha Bamieh për BIRN.
“Ata filluan të shpifin kundër meje. Më quajtën, të çmendur, një kolege e pakënaqur,” tha ajo.
EULEX ka refuzuar të komentojë publikisht akuzat e saj.
Por EULEX njoftoi se Bamieh u pezullua pas një hetimi për rrjedhje dokumentesh te media vendore.
“T’i bish bilbilit nuk nënkupton që mund të dërgosh dokumente konfidenciale në media, veçanërisht kur një proces ka filluar sakaq nga organizata,” deklaroi EULEX në një njoftim për shtyp të publikuar nga agjencia franceze e lajmeve AFP.
EULEX punon mbi rastet e krimit të organizuar, korrupsionin dhe krimet e luftës, të cilat konsiderohen si tepër të rëndësishme ose të ndjeshme për t’u trajtuar nga institucionet e drejtësisë së Kosovës.