Politikanët serbë shkëmbyen akuza mbi mbërritjen e pritshme në Beograd të udhëheqësit nacionalist Sheshel pas lirimit të tij me kusht nga Gjykata e Hagës për mjekim të kancerit.
Ministri i Punës Aleksandar Vulin këmbënguli se Shesheli, i cili pritet të mbërrijë në Beograd nga Haga të martën, do të kërkojë të destabilizojë qeverinë e udhëhequr nga Partia Progresive, disa prej udhëheqësve të së cilës kanë qenë pjesë e Partisë Radikale të të akuzuarit për krime lufte.
Vulin akuzoi të dielën se vendimi për t’i dhënë Sheshelit liri me kusht qe ndikuar nga vende perëndimore, të cilat nuk i përmendi me emër, me synimin “për të minuar kryeministrin reformator Aleksandar Vucic”.
Por Vucic, i cili u largua nga Partia Radikale e Sheshelit dhe krijoi Partinë Progresive në vitin 20008, refuzoi të japë një opinion mbi pasojat e mundshme politike të rikthimit të ish udhëheqësit të tij.
“I uroj shëndet,” tha Vucic në komentin e tij të vetëm mbi ngjarjen të shtunën.
Deputeti Milorad Drecun nga Partia Progresive tha gjithsesi se skuadra e Vucic qe “mjaftueshëm e fortë” për t’i rezistuar ndikimeve të mundshme destabilizuese të Sheshelit.
“Partia që mori mbështetjen e 50 për qind të votuesve në zgjedhje dhe që ka një pozicion të qëndrueshëm politik nuk mund të shkatërrohet nga Vojisllav Shesheli, as nga partia e tij, e cila mori dy apo tre për qind të votave në zgjedhje,” tha Drecun.
Por Balsa Bozovic, një deputet nga Partia Demokratike në opozitë, pretendoi se Progresistët po bëheshin “gjithnjë e më nervozë”.
“Shumë anëtarë që gjatë kohës [kur Sheshel ka qenë në gjyq për krime lufte në Hagë] janë larguar nga Radilakët për te Progresistët dhe tashmë shumë prej tyre po mendojnë se duhet të kthehen atje,” tha Bozovic.
Gjykata Ndërkombëtare Penale për Ish Jugosllavinë ICTY i dha të enjten liri me kusht Sheshelit, i cili ka qenë në gjyq prej 11 vjetësh për krime të kryera në Bosnjë e Hercegovinë, Kroaci dhe Serbi gjatë viteve 1990.
Gjykata e mbështetur nga OKB tha se lirimi i kreut të Partisë Radikale të Serbisë po bëhej për arsye humanitare, duke përmendur përkeqësimin serioz të shëndetit të tij si një nga arsyet kryesore. Ai u diagnostikua me kancer vitin e kaluar.
Presidenti i Kroacisë Ivo Josipovic gjithsesi shprehu zhgënjim për faktin që Shesheli po lejohej të kthehej në Serbi para se gjykata të japë vendimin e vet.
“Është për të ardhur keq që ky gjyq nuk përfundoi me vendim fajësie siç e prisnim ne të gjithë,” i tha Josipovic medias në qytezën e Vukovarit të shtunën.
Rasim Ljajic, kreu i Këshillit Kombëtar të Serbisë për Bashkëpunimin me ICTY, konfirmoi se Shesheli ka gjasa do të mbërrijë ne Beograd të martën.
“Ne kemi informacion nga gjykata e Hagës se Shesheli dhe mjekët e tij kanë bërë një marrëveshje për ta shtyrë mbërritjen e tij me gjasa deri të martën, deri sa dokumentet e tij mjekësore të përkthehen në mënyrë që ai të mjekohet nga doktorët e tij,” tha Ljajic në një deklaratë të dielën.
“Ne dëshëm të dërgonim policinë dhe stafin e ambasadës për ta shoqëruar atë në aeroport [në Hollandë], por ai refuzoi,” shtoi Ljajic.
Shesheli ka qenë i ndaluar në Hollandë që nga viti 2003, kur ai u dorëzua vullnetarisht. Vendimi i tij qe planifikuar të jepej tetorin e vitit të kaluar, por u shty pasi një nga gjykatësit në gjyqin e tij u hoq pas akuzave për anësi.
Gjykatësi i ri pritet të vijojë punën së paku deri në qershor 2015 për të familjarizuar veten me detajet e çështjes, duke shkaktuar edhe një vonesë tjetër në këtë gjyq maratonë.
