Mali i Zi ka caktuar një buxhet shtetëror prej 2 miliardë euro për vitin 2015, një e katërta më shumë se në 2014, për të mbuluar kreditë për ndërtimin e autostradës dhe për shlyerjen e kredive të mëparshme.
Kabineti i Malit të Zi të hënën duhej të miratonte projektligjin e Buxhetit të vitit 2015 pasi ligji i miratuar më herët u kthye përsëri për rishqyrtim.
Kabineti ra dakord të caktonte një shifër prej 2 miliard eurosh, 455 milion euro më shumë krahasuar me buxhetin e këtij viti.
Qeveria pret një deficit buxhetor 6.78 për qind, kryesisht për shkak të ndërtimit të një autostrade dhe nevojës për shlyerje të 400 milionë eurove garanci bankare dhe hua nga vitet e shkuara.
Sipas draftit të buxhetit, qeveria vitin e ardhshëm do të duhet të marrë borxh deri në 650 milion euro për të paguar obligacionet e huasë dhe deficitin buxhetor.
Rreth 240 milionë euro do të veçohen për të mbuluar hendekun buxhetor, përfshirë 206 milion euro në kreditë e marra për autostradën.
Mali i Zi do ta mbajë TVSH-në 19 për qind dhe qeveria do të vazhdojë të mbledhë ‘taksën e krizës’ prej 9 për qind të pagave mujore mbi 480 euro.
“Qëllimi është të sigurohet mbështetje më e fortë për projektet kryesore të zhvillimit të Malit të Zi dhe të inkurajohen investitorët e huaj në mënyrë që të stimulohet rritje ekonomike dhe të krijohen vende të reja pune,” tha kabineti në një deklaratë.
Komisioni Europian dhe Fondi Monetar Ndërkombëtar, FMN, në projektimet e tyre të vjeshtës e ulën parashikimin e zhvillimit të Malit të Zi nga 3.6 për qind siç ishte menduar në maj në 3 për qind.
Megjithatë komisioni tha se pritej që aktiviteti ekonomik të rritej nga viti 2016.
