Presidenti bullgar i bën nderime Georgi Markov, i cili u vra në Londër 1978, teksa statuja e tij ngrihet në Sofje.
Presidenti i Bullgarisë, Rosen Plevneliev, ka zbuluar statujën e disidentit bullgar Georgi Markov, i cili u vra në urën Vaterlo, në Londër, në vitin 1978 në një nga vrasjet më famëkeqe në kuadër të epokës së Luftës së Ftohtë.
Markov, i cili ka punuar në BBC World Service, ishte helmuar, mesa duket me urdhër të autoriteteve komuniste bullgare. Një pilulë që përmbante toksinë u injektua në këmbën e tij. Presidenti Plevneliev tha: “ Fjalët e Georgi Markov çliruan shpirtërisht bullgarët, madje edhe përpara rrëzimit të regjimit komunist”.
Ata që morën pjesë në ceremoni, përfshinë dhe të venë e Markov, Annabel, e cila foli për mënyrën se si burri i saj i ndjerë ëndërronte të kthehej në Bullgari, qoftë dhe për 24 orë, edhe pse ai e dinte se kjo do mbetej një fantazi. “Ai është kthyer tashmë në Bullgari, “si pjesë e përhershme e peisazhit të Sofjes”,-tha ajo.
Markov po priste një autobus për në BBC në urën në qendër të Londrës, kur ai ndjeu një goditje të mprehtë në këmbë dhe pa aty afër një burrë që i ra çadra. Njeriu i kerkoi falje në një theks të huaj dhe u zhduk. Markov shkoi për të punuar, por brenda një kohe të shkurtër filloi t’i rritej temperatura. Ai vdiq pesë ditë më vonë në spital, 40 vjeç.
Vrasja mendohet të jetë kryer me urdhër të shërbimit sekret bullgar, ndoshta me ndihmën e KGB-së sovjetike, për të ndalur transmetimet e tij në radio. Sulmi ndodhi në ditëlindjen e diktatorit bullgar Todor Zhivkov.
Markov shkoi në mërgim në vitin 1969 dhe u bë një kritik i regjimit komunist bullgar. Vrasësi nuk është gjetur ende.
Një libër i çështjes publikuar në Bullgari në vitin 2005, konkludon se agjentët e KGB-së komplotuan për të vrarë Markov në bashkëpunim me një agjent bullgar, i koduar “Piccadilly”.
Në vitin 2007, një ekip i oficerëve të policisë britanike udhëtuan drejt Bullgarisë, i ndjekur nga një vizitë tjetër në vitin 2008, të cilët kërkuan të çonin çështjen më tej si dhe të kërkonin leje për të intervistuar policët sekretë komunistë të kohës. Sidoqoftë, sipas ligjit bullgar, statusi i kufizimit 30-vjeçar i çështjes skadoi në shtator 2008.
Media britanike nuk e ka humbur kurrë interesin për çështjen dhe vrasësin. Në vitin 2013, gazeta britanike, The Daily Mail, pohoi se e kishin gjurmuar atë në pjesën e poshtme të Austrisë.
