Fondi Monetar Ndërkombëtar, FMN, e ka nxitur Rumaninë të mos rrezikojë progresin e arritur në vitet e fundit, duke mbajtur nën kontroll shpenzimet.
“Ka një zotim të Rumanisë për të vazhduar konsolidimin e situatës fiskale. Ndaj ne presim që një zotim i tillë të përmbushet,” Guillermo Tolosa, përfaqësues i FMN në Rumani dhe Bullgari të martën.
Tolosa shtoi se “përpjekje të mëdha janë bërë për të forcuar ekonominë e Rumanisë, ndaj është e rëndësishme për vendin të mos e rrezikojë këtë përpjekje të madhe,” raportoi agjencia Reuters e lajmeve.
Paralajmërimi shprehu shqetësimin e ndjerë nga FMN se qeverisja e qendrës së majtë e Victor Pontas mund të jetë duke kërkuar një dalje nga një marrëveshje ndihme me institucionin financiar vitin e ardhshëm.
Marrëveshja e fundit e Rumanisë me FMN-në daton në vitin 2009. Ishte e treta e një huaje të tillë. FMN-ja i pezulloi bisedimet për një marrëveshje të re deri në zgjedhjet presidenciale.
Ponta pritet të bëhet kreu i ardhshëm i shtetit Rumun në një fushatë elektorale që merr fund me një balotazh më 16 nëntor.
Përgjatë fushatës elektorale ai ka trumbetuar lehtësimin e masave shtrënguese dhe uljen e taksave gjatë dy viteve si kryeministër. Ai ka premtuar gjithashtu rritje të pensioneve vitin e ardhshëm.
Ponta është i mendimit se Rumania do ta ulë deficitin buxhetor vitin e ardhshëm pa rritur përsëri taksat.
“Rumania do të arrijë një deficit më poshtë se limiti 2.2 për qind i PBB të rënë dakord me FMN në fund të dhjetorit… dhe vitin e ardhshëm deficiti do të jetë 1.4 për qind të PBB, pa asnjë rritje taksash,” tha Ponta të martën në një debat televiziv.
Analistët dhe organizatat ndërkombëtare thonë se qëllime të tilla janë të vështira për t’u arritur. Më herët këtë muaj, Komisioni Europian tha se priste që deficiti buxhetor i Rumanisë të arrinte 2.1 për qind të PBB këtë vit dhe se do të rritej në 2.8 për qind vitin e ardhshëm, nëse qeveria nuk rrit taksat dhe nëse nuk ul shpenzimet ndërkohë.