Komisioni i qeverisë i ngarkuar me detyrën për të verifikuar se kush luftoi për Ushtrinë Çlirimtare të Kosovës gjatë konfliktit të viteve 1998-99 ka njoftuar se veteranët do të fillojnë të përfitojnë pension lufte nga janari 2015.
Në total, 66,300 njerëz aplikuan për statusin e veteranit të luftës, por vetëm 16 mijë prej tyre janë gjykuar se e meritojnë, njoftoi drejtori i komisionit Faik Fazliu për median e Kosovës.
Rreth 14 mijë aplikime janë ende për t’u verifikuar.
“Lista e [veteranëve të verifikuar] do të publikohet në dhjetor. Në janar, pritet që veteranët të fillojnë të marrin përfitimet që meritojnë,” tha Fazliu.
Fazliu i tha BIRN muajin e kaluar se vlerësimet e qeverisë sugjerojnë se rreth 20 mijë njerëz luftuan për Ushtrinë Çlirimtare të Kosovës.
Në prill këtë vit, deputetët miratuan legjislacioni e ri që i jep përfitime ish guerilasve të UÇK-së.
Ligji parashikon përfitime për ata që luftuan në konfliktin e viteve 1998-99 me Serbinë por nuk mund të hyjë në fuqi deri sa ish luftëtarët e UÇK-së të verifikohen si të tillë.
Veteranët e papunë do të marrin një pagesë mujore jo më të vogël se sa paga minimale në Kosovë – 170 euro për njerëzit mbi 35 vjeç dhe 130 euro për ata që janë nën 35 vjeç.
Qeveria ka vënë mënjanë rreth 25 milionë euro në buxhetin e vet për përfitimet për ish-luftëtarët dhe për njerëzit që u përdhunuan gjatë luftës.
