Hapja për publikun e një bunkeri të madh të Luftës së Ftohtë, ndërtuar në vitet 1970 për t’i mbijetuar sulmeve bërthamore, shkaktoi ankesa nga një pjesë e shqiptarëve të cilët e quajtën atë si rehabilitim të të shkuarës komuniste.
Bunkeri, i cili ndodhet në periferi të Tiranës, u hap për herë të parë për publikun të shtunën, i kompletuar me objekte kujtimesh nga ish diktatori stalinist i Shqipërisë Enver Hoxha.
Në ceremoninë e hapjes, kryeministri i Shqipërisë Edi Rama i tregoi kompleksin e tuneleve me pesë kate dhe 106 dhoma një grupi ambasadorësh të vendeve perëndimore në Tiranë.
“Ne kemi hapur sot një thesar të kujtesës sonë kolektive që përfaqëson mijëra copa nga gjarjet e hidhura dhe jeta nën komunizëm,” tha Rama në një fjalim në sallën kinema të bunkerit.
Për gati gjysmë shekulli, Hoxha sundoi Shqipërinë me grusht të hekurt duke e kthyer vendin në një nga më të izoluarit në botë, të krahasueshëm sot vetëm me Korenë e Veriut.
I vetëshpallur në armiqësi me Bashkimin Sovjetik – të cilin nuk e konsideronte mjaftueshëm stalinist – Hoxha ndërtoi mijëra bunkerë nëpër të gjithë vendin nga vitet 1970 deri në vdekjen e tij më 1985 për t’u mbrojtur ndaj një sulmi potencial.
Bunkeri u hap për publikun si pjesë e eventeve të organizuara me rastin e 70 vjetorit të çlirimit të Shqipërisë në fund të Luftës së Dytë Botërore dhe qeveria ka njoftuar se në të ardhmen ky mjedis do të përdoret si atraksion turistik dhe vend ekspozitash i quajtur Bunk-Art.
Gjithsesi, jo të gjithë janë dakord me vendimin e kryeministrit për të hapur këtë muze dhe disa kritikë kanë paralajmëruar se tuneli po kthehet si një lloj memoriali për Enver Hoxhën.
“Askush nuk duhet të besojë se Bunk-Arti i Ramës në Malin e Dajtit është një muze mbi bunkerët e Hoxhës,” paralajmëroi ish i burgosuri politik i kthyer në politikan Spartak Ngjela në një njoftim në Facebook.
“Është një metodë tipike e propagandës totalitariste për të hapur ilegalisht një muze për Enver Hoxhën,” shtoi ai.
Sipas Ngjelës, bunkeri i cili u grabit gjatë trazirave të vitit 1997, nuk mbartte relike për t’u ekspozuar dhe ngriti pikëpyetjen se ku i ka gjetur qeveria këto relike për muzeun e ri.
“A mund të besoni se Hoxha do të mbante fotografinë e tij të epokës së Luftës së Dytë Botërore në zyrën e vet?” pyeti Ngjela.
Sociologu Ergys Mërtiri është dakord, duke thënë se fjalimi i Ramës gjatë ceremonisë së hapjes së bunkerëve qe kundër Hoxhës dhe diktaturës, por vetë ekspozita duket se glorifikon regjimin e kaluar.
“Diktatura, totalitarizmi, dhuna dhe terrori janë gjëra serioze dhe nuk duhet të ngatërrohet me xhinglat e ish artistëve të konvertuar në politikanë,” tha ai, duke krahasuar fjalimin e Ramës, një ish-piktor me një këngë sipërfaqësore muzike popullore.