Rritjet e taksave dhe e çmimit të energjisë elektrike duket se e bindën FMN-në të japë miratimin për politikat e uljes së borxhit publik si dhe të shpërblejë qeverinë me 53 milionë euro kredi të buta.
Fondi Monetar Ndërkombëtar njoftoi se ka arritur një mirëkuptim me qeverinë shqiptare në nivel stafi misioni për të përfunduar rishikimin e dytë dhe të tretë të marrrëveshjes së ndihmës mes Tiranës dhe Fondit të nënshkruar fillimisht vitin e kaluar.
Misioni nuk arriti të mbyllë rishikimin e dytë të marrëveshjes në shtator të këtij viti kur misioni u largua pa deklaratë finale dhe qeveria nuk arriti të marrë këstin e rradhës prej 26.5 milionë eurosh, pasi Tirana zyrtare nuk u shpreh tërësisht e bindur për rritjen e taksave dhe të çmimit të energjisë elektrike në atë kohë.
Por së fundmi, qeveria futi në parlament projektligjin për buxhetin e vitit 2015, i cili parashikon disa masa fiskale që sjellin rritjen e përgjithshme të taksave me rreth 160 milionë dollarë.
Pas përfundimit të bisedimeve të zhvilluara nga 17 nëntori deri më 25 nëntor 2014, shefi i misionit Nadeem Ilahi deklaroi: “Programi ekonomik i Shqipërisë është në rrugën e duhur. Skuadra e FMN arriti mirëkuptim në nivel stafi me autoritetet mbi politikat e nevojshme për të përfunduar rishikimet e dyta dhe të treta të Marrëveshjes”.
Pas kësaj, misioni i Fondit pritet të raportojë para bordit të Drejtorëve të FMN-së në Uashington, i cili do të japë firmën finale.
“Bordi Ekzekutiv i FMN pritet të diskutojë rishikimin e dytë dhe të tretë vonë në janar 2015. Miratimi i rishikimit do të mundësojë disbursimin e 47.1 milionë SDR-ve, (rreth 53 milionë Euro),” tha Ilahi.
Marrëveshja mes Shqipërisë dhe FMN-së parashikon që Shqipëria të marrë 330 milionë euro kredi të butë brenda tri viteve përkundrejt një interesi të luhatshëm mes dy dhe tre për qind në vit.
Kredia do të disbursohet me 9 këste brenda tri viteve. Kësti i parë u lëvrua në shkurt të këtij viti bashkë me miratimin e marrëveshjes ndërsa kësti i dytë erdhi në qershor. Qeveria e pati të vështirë të marrë këstin e tretë dhe u detyrua të ndryshojë buxhetin e shtetit këtë vit përmes një akti normativ, në të cilin zhvendosi një pjesë të kredive që priteshin nga FMN për t’i zëvendësuar me borxh të brendshëm.
Fondi Monetar Ndërkombëtar pret nga Shqipëria që të ndalojë rritjen dhe më pas të ulë borxhin publik si përqindje e PBB-së brenda afatit të kësaj marrëveshjeje.
Borxhi publik shqiptar është aktualisht rreth 68 për qind e PBB-së dhe pritet të ulet në mënyrë drastike gjatë viteve të ardhshme me objektivin e rënies nën 60 për qind të PBB-së rreth vitit 2018.
