Pesë persona të dyshuar për rekrutim të luftëtarëve xhihadistë nga Bosnja dhe Hercegovina për të marrë pjesë në konfliktet në Siri dhe Irak janë liruar së fundmi.
Husein Bilal Bosnic, i dyshuari kryesor në grupin e arrestuar për dyshim të financimit, organizimit dhe rekrutimit të boshnjakëve që luftojnë në Lindjen e Mesme, u lirua nga paraburgimi të martën së bashku me katër të tjerë.
Bosnic u mbajt në paraburgim që kur u arrestua tre muaj më parë në një operacion policor të shkallës së gjerë me emrin e koduar “Damask”, i cili kishte si qëllim të godiste rekrutuesit islamikë.
Avokati i Bosnic, Adil Lozo tha për Balkan Insight se nuk kishte urdhër gjykata për të zgjatur paraburgimin e të pandehurit që ai kishte marrë në mbrojtje dhe se ai ishte liruar nga masat shtrënguese.
Ai tha se provat kundër klientit të tij ishin të dobëta.
“Askush nuk mund ta provojë fajin e tij,” tha Lozo.
“Ai është akuzuar se po i frymëzon njerëzit të shkojnë në Siri. Kjo ka të bëjë me idetë dhe fjalimet… Ai nuk ka shkuar kurrë në Siri.”
Bosnic, i cili besohet se është një nga liderët e lëvizjes islamike “Vahabi” në Bosnje, ishte mes 16 të arrestuarve më 3 shtator.
Një video e Bosnic u publikua në median vendase këtë vit, ku ai shfaqej teksa mbante një fjalim që mbështeste haptazi Shtetin Islamik (IS), forcë militante që po përpiqet të ndërtojë një kalifat fundamentalist në Siri dhe Irak, për të cilin boshnjakët kanë shkuar për të luftuar.
Zyra e Prokurorit nuk bëri komente rreth lirimit të Bosnic dhe të dyshuarve të tjerë dhe aktualisht po kryen hetime përpara se të nxjerrë një aktakuzë.
Vlado Azinovic, një profesor i Shkencave Politike në Sarajevë dhe një ekspert i çështjeve të terrorizmit, tha për Balkan Insight në shtator se ishte e qartë që myslimanët e Bosnjës ishin përfshirë në konfliktet në Siri dhe Irak, pavarësisht se në numër të vogël.
“Vlerësohet se këto tri vite që kur filloi konflikti në Siri, rreth 160 burra nga Bosnja dhe Hercegovina ishin atje dhe gjithashtu 20 gra,” tha Azinovic.
“Këta janë përgjithësisht njerëz që vijnë nga kushte të caktuara sociale, ekonomike dhe gjeografike, që nuk kanë prosperitet për punë, as aftësi, me edukim të kufizuar, të cilët besojnë se po përmbushin misionin e tyre atje,” shtoi ai.
