Ekspertët thanë se ekziston një kontradiktë midis pretendimeve se ligji i ri i punës shkaktoi rënie të papunësisë dhe të dhënat thonë se numri i personave të punësuar nuk është rritur me të njëjtën shifër.
Pasi Aleksandër Vulin, ministri serb i punës, tha se qeveria kishte arritur të ulte papunësinë me më shumë se gjashtë për qind në një vit, ekspertët paralajmëruan se tregu i punës nuk ishte ashtu siç ai e paraqiti.
“Nëse të dhënat e qeverisë janë të vërteta, pritet një rritje ekonomike, gjë që nuk po ndodh,” tha Milojko Arsic, një profesor ekonomiksi në Universitetin e Beogradit për BIRN.
Sipas Vulin, ligji i punës i miratuar së fundmi ka vërtetuar tashmë se është i suksesshëm sepse ndihmoi në rënien e shkallës së papunësisë në 17.6 për qind.
“Ligji i Punës” është një nga ligjet që kanë kontribuar në rënien e shkallës së papunësisë; nuk është i vetmi, por është e sigurt se është një prej faktorëve,” tha Vulin të mërkurën.
Ai citoi të dhënat e publikuara nga Zyra e Statistikave të Republikës Serbe, që tha se shkalla e papunësisë në gusht ishte 17.6 për qind, krahasuar me 24.1 për qind të të njëjtit muaj një vit më parë.
Megjithatë, Zyra e Statistikave tregoi gjithashtu se në të njëjtën periudhë, punësimi u rrit nga 52.1 për qind në 55.2 për qind.
Mijat Lakicevic, një ekspert ekonomiksi në Beograd, tha se mund të kishte disa arsye për rënien e papunësisë përveç ligjit të punës.
“Disa njerëz mund të kenë dalë në pension, disa të tjerë, për arsye të ndryshme mund të jenë hequr nga lista e papunësisë,” tha Lakicevic.
Ai citoi gjithashtu se një rënie e papunësisë nuk do të thotë domosdoshmërish se është përmirësuar ekonomia në përgjithësi.
“Çelësi do të ishte rritja e përqindjes së punësimit,” tha ai për BIRN.
Arisc tha se mund të kishte disa arsye për iluzionin që kishte krijuar Vulin, duke cituar gabimet në matjen dhe metodologjinë e ndryshuar mes arsyeve.
Duke i quajtur të dhënat e qeverisë ‘të çuditshme’, Arsic shtoi se të dhënat ‘nuk reflektojnë situatën e vërtetë në tregun e punës’.
Ligji i ri i punës u miratua në qershor, disa muaj pas protestave nga punëtorët dhe negociatave mes qeverisë dhe unioneve.
Sindikatat u ankuan se ligji e bënte më të lehtë për punëdhënësit të hiqnin nga puna stafin që nuk respektonte disiplinën dhe që nuk arrinte performancën e duhur dhe thanë se u hiqte atyre shumë të drejta.
Ligji, që është parë si një zgjidhje e ndërmjetme, duhet të ndryshohet në të ardhmen e afërt si pjesë e procesit të integrimit të Serbisë në BE.
Një version i mëparshëm i projektligjit të punës solli polemika dimrin e shkuar dhe rezultoi në dorëheqjen e ministrit të ekonomisë Sasa Radulovic, i cili po kërkonte ndryshime të thella në legjislacionin e punës të cilat qeveria nuk ishte gati t’i zbatonte.
Disa vëzhgues besojnë se kjo është arsyeja përse, më pas, u bënë zgjedhje parlamentare të parakohshme.