Megjithëse 70 për qind e konsumit mbulohet nga hidrocentralet, Shqipëria ka çmimin më të lartë në rajon me përjashtim të Kroacisë, Rumanisë dhe Malit të Zi.
Çmimi i energjisë elektrike për konsumatorët familjarë në Shqipëri vitin e ardhshëm pritet të arrijë në 11.08 lekë ose 9.5 cent të euros për kWh, duke e bërë vendin tonë një nga më të shtrenjtët në Ballkan. Sipas çmimeve mesatare të raportuara nga agjencia statistikore europiane EUROSTAT, në rajonin e Ballkanit vetëm Mali i Zi dhe Rumania kanë çmime më të shtrenjta se sa Shqipëria ndërsa vendet e tjera kanë që të gjitha çmime më të ulëta.
Nga këto të dhëna del se Kosova ka çmimin më të ulët në Ballkan me 5.5 cent të euros për kWh, pasuar nga Serbia me 6.1, Maqedonia dhe Bosnja e Hercegovina me 7.9 dhe Bullgaria me 8.3 cent të euros për kWh. Çmimi më i shtrenjtë në Ballkan gjendet në Kroaci me 13.1 cent të euros pasuar nga Rumania me 12.9 dhe Mali i Zi me 10.3 cent të euros për kWh.
Çmimi i energjisë elektrike në vende të ndryshme të botës përcaktohet para së gjithash nga burimet e prodhimit të kësaj energjie si dhe nga standardet mjedisore të zbatuara në këtë sektor.
Kështu, vendet që kanë prodhim të lartë të energjisë elektrike me burime hidrologjike kanë kosto më të ulëta prodhimi dhe rrjedhimisht edhe çmime më të ulëta. Por ka shumë pak vende në botë ku prodhimi i energjisë nga burimet hidro mbulon pjesë të konsiderueshme të konsumit dhe shumica e vendeve përdorin burime të tjera, të cilat janë më të shtrenjta.
Burimi tjetër i lirë i energjisë elektrike është energjia e prodhuar nga impiantet bërthamore, e cila ka një kosto prej 1.2 deri në 2 cent të euros për kWh, pasuar nga termocentralet me qymyr, ku, pa marrë parasysh kostot mjedisore, prodhimi i energjisë elektrike kushton 2 deri në 3 cent të euros për kWh.
Gazi dhe më tej nafta kanë kosto më të lartë të prodhimit të energjisë elektrike pasuar nga burimet e rinovueshme si era apo dielli, kostoja e të cilave është më e lartë. Mbi koston e prodhimit shtohet kostoja e transmetimit, ajo e shpërndarjes dhe e humbjeve teknike.
Shqipëria mbulon mesatarisht 70 për qind të konsumit të vet me energji të prodhuar nga hidrocentralet, kostoja e të cilës është 1 lek. Kostoja e pranuar e transmetimit është 0.7 lekë për kWh. Këtyre u shtohen kostot e 30 për qind të energjisë elektrike e cila importohet me çmim mesatar prej 5 centësh për kWh për të mbërritur në një kosto mesatare të ponderuar prej rreth 2 lekësh. Mbi këto duhet të shtohet kostoja e transmetimit, shpërndarjes dhe humbjeve teknike. Por shkaku kryesor se pse çmimi aktual mesatar kërkohet të rritet nga 9.5 në 12.3 lekë lidhet me faktin se rreth 40 për qind e energjisë së hedhur në treg vidhet ose nuk paguhet ndërsa kostot e energjisë janë të fryra nga keqmenaxhimi i sistemit elektroenergjetik në të tashmen dhe në të shkuarën.
Enti Rregullator i Energjisë kreu të premten seancën dëgjimore publike në lidhje me aplikimin e operatorëve të tregut të energjisë elektrike për tarifat e reja të vitit 2015, duke publikuar edhe tarifat e kërkuara nga këta operatorë.
Aplikimi i Operatorit të Shpërndarjes së Energjisë Elektrike, OSHEE kërkon një tarifë fundore mesatare prej 12.32 lekë pa TVSH, me një rritje prej 29.3 për qind në krahasim me tarifën mesatare aktuale prej 9.53 lekësh. Rritja e çmimit është kërkuar për të gjithë operatorët, përfshirë industrinë, biznesin dhe ndërmarrjet publike, por rritja më e madhe kërkohet te konsumatori familjar.