Një samit dy-ditor i liderëve nga Kina dhe Europa Qendrore dhe Lindore u çel në Beograd të martën me diskutime bilaterale që synojnë të nxitin marrëdhëniet midis shteteve në fjalë.
Mbi 5000 anëtarë të delegacioneve të ndryshme nga Kina dhe shtetet e Europës Qendrore dhe Lindore zbarkuan në Beograd për të diskutuar projekte të përbashkëta në bujqësi, industri, turizëm, IT, transport dhe infrastrukturë.
Samiti i liderëve kinezë dhe atyre të Europës Lindore filloi të martën me takimin bilateral të Aleksandër Vuçiç të Serbisë dhe Ministrit kinez të Tregtisë, Gao Hucheng, i pasuar nga takimi me Ministrin kinez të Transportit, Yang Chuantang.
Ndërtimi i një linje hekurudhore të shpejtësisë së madhe midis Beogradit dhe Budapestit dhe metodat e financimit të projektit ishin mes temave të disktuara.
Gjatë takimit, dy ministrat ranë dakord të përfundonin një studim fizibiliteti për hekurudhën deri në qershor 2015, me qëllim që projekti të përfundojë në qershor 2017, tha qeveria serbe.
Vuçiç gjithashtu mbajti bisedime bilaterale me Kryeministrin malazez Milo Djukanovic dhe atë të Rumanisë, Viktor Ponta, për të diskutuar çështje ekonomike rajonale dhe bashkëpunimin në infrastrukturë.
Më vonë të martën, Vuçiç takoi kryeministrat e Sllovenisë, Letonisë dhe Republikës Çeke, ndërsa takimet me kryeministrat e tjerë do të mbahen të mërkurën.
Sytë e të gjithë pjesëmarrësve të samitit, janë mbi kryeministrin kinez Li Keqiang, teksa 16 shtetet shpresojnë për kredi dhe investime nga Kina.
“Samiti do të nxisë jo vetëm marrëdhëniet ndërshtetërore Kinë-Serbi, por do të jetë i dobishëm edhe për bashkëpunim të mëtejshëm mes Kinës dhe shteteve të Europës Qendrore dhe Lindore, dhe do të shërbejë për të zhvilluar marrëdhëniet e Kinës me Europën,” tha Li Keqiang në mbërritjen e tij në Beograd të hënën.
Zorana Mihajlovic, zëvendës kryeministrja serbe dhe ministrja e Infrastrukturës tha se samiti ishte një ngjarje madhore për të gjithë shtetet pjesëmarrëse.
Gjatë samitit, kryeministrat dhe liderët e biznesit do të marrin pjesë në Forumin e katërt ekonomik në qytetin Sava Centre.
Forumi do të hapet zyrtarisht nga kryeministrat e Serbisë dhe Kinës së bashku me atë të Polonisë, që do lajmërojë krijimin e një komiteti të përbashkët ekonomik të Kinës me vendet e Europës Qendrore dhe Lindore.