Në të gjitha komunat serbe në Kosovë po vendosen forca të mëdha policie, ndërsa serbët në vend po përgatiten për Krishtlindjen Ortodokse dhe presin vizita nga zyrtarë të Beogradit.
Policia ka shtuar praninë e saj në të gjithë Kosovë, në përgatitje për festën kryesore fetare të minoritetit serb.
| Qëllohen me akull pelegrinët serb në Gjakovë
Policia e Kosovës arrestoi dy anëtarë të Lëvizjes Nacionaliste Vetëvendosja se qëlluan me akull një autobus që çonte pelegrinë në ceremonitë ortodokse serbe në qytetin perëndimor të Gjakovës. Rreth 100 persona ishin mbledhur në Gjakovë për të protestuar kundër vizitës. Pas sulmit, pelegrinët vendosën ta anulonin vizitën e tyre në kishë. Kriste Gjoka, zëdhënësja e policisë së Gjakovës, tha për BIRN se policia po i ruante pelegrinët dhe garantonte sigurinë e plotë të tyre. “Dy qytetarë u arrestuan sepse gjuajtën me akull dhe dëmtuan një nga dritaret e autobusit. Njëri nga pelegrinët më pas tha se kishte vendosur të kthehej e mos hynte në kishë për shkak të motit,” tha Gjoka për BIRN. Në deklaratën e saj për shtyp, Vetëvendosja tha se banorët vendas e organizuan protestën kundër pelegrinëve, sepse njëri prej vizitorëve ishte një i dyshuar për krime lufte. |
Policia ka hartuar “një plan operacional që ka si qëllim të ruajë rendin dhe garantojë sigurinë”, tha për BIRN Baki Kelani, zëdhënës i policisë.
“Parashikojmë masa shtesë sigurie dhe një rritje të vigjilencës së policisë në vende ku mendojmë se është e nevojshme, në mënyrë që këto festime të kenë shpirt pushimesh,” shtoi ai.
Serbët e festojnë Krishtlindjen dy javë pas Kishës Katolike, siç bëjnë edhe pjesa më e madhe e anëtarëve të Kishës Ortodokse kudo tjetër.
Festimet kryesore në Kosovë do të zhvillohen në manastirin Gracanica, një komunitet i madh serb i përqendruar në një kishë mesjetare rreth 15 minuta nga kryeqyteti Prishtina.
Kryetari i Zyrës së Kosovës në qeverinë serbe, do të marrë pjesë në festimet në Gracanica me rastin e Krishtlindjes ditën e martë pasdite.
Aleksandar Vulin, Ministri i Punëve të Serbisë do të marrë pjesë në ceremoninë e Krishtlindjes në manastirin në Zociste.
Miroslav Vasin, zv/president i qeverisë provinciale të Vojvodinës në veri të Serbisë, do ta kalojë Krishtlindjen në fshatin etnik serb të Gorazdevacit dhe do të marrë pjesë në meshën e Krishtlindjes në manastirin e famshëm të Deçanit në Kosovën perëndimore.
Lideri i Kishës Serbe patriarku Irinej ka shfrytëzuar rastin për t’i kërkuar serbëve të mbetur në Kosovë
të mos largohen nga Kosova në mesazhin e tij të Krishtlindjes ditën e hënë.
“Këtë Krishtlindje jemi bashkuar me vëllezërit dhe motrat tona në Kosovë dhe Dukagjin dhe i kërkojmë atyre të rrinë të jetojnë në Kosovë,” tha Irinej.
Në Kosovë kanë mbetur vetëm 100,000 serbë pas eksodit të pas-luftës. Në vend banojnë afërsisht 2 milion kryesisht shqiptarë myslimanë.
Në planin e pavarësisë së Kosovës, mbrojtja e serbëve fetarë dhe vendeve trashëgimi kulturore në Kosovë ndahet midis paqeruajtësve të NATO-s në KFOR dhe policisë së Kosovës. Në Vioski Deçan, KFOR-i ofron mbrojtje 24 orë për murgjit që jetojnë atje.
Pavarësisht përpjekjeve, manastiret janë ende objektiva të grafiteve nacionaliste dhe huliganizmave, ndërsa tensionet mbeten ende të larta midis dy komuniteteve etnike.
