Një lider serbo-kroat, Milorad Pupovac, tha se fitorja e Kolinda Grabar Kitaroviçit në zgjedhjet presidenciale do t’i dëmtojë edhe më shumë marrëdhëniet e tensionuara midis dy vendeve fqinje.
Një anëtar i parlamentit kroat dhe lider i pakicës serbe, Milorad Pupovac, tha se rezultati në zgjedhjet presidenciale kroate të mund të ketë një ndikim të mëtejshëm negativ në marrëdhëniet Kroaci-Serbi.
Marrëdhëniet mes dy vendeve ishin të acaruara për shkak të një sërë arsyesh, duke përfshirë gjyqet për genocid në Gjykatën Ndërkombëtare të Drejtësisë dhe lirimin e parakohshëm të të akuzuarit serb për krimine lufte Vojisllav Sheshel nga Haga.
Pupovac tha se zgjedhja e Grabar Kitaroviç, e cila mbështetet nga Bashkimi Demokratik Kroat i qendrës së djathtë, HDZ-ja, nuk do t’i përmirësojë gjërat.
“Marrëdhëniet midis Serbisë dhe Kroacisë me siguri nuk do të përmirësohen edhe për të paktën një vit,” tha Pupovac, duke shtuar se Grabar Kitaroviç nuk kishte gjasa të ndryshonte axhendën mbi të cilën ajo fitoi zgjedhjet.
Ajo “do të punojë kundër qeverisë në Zagreb dhe me një politikë anti-rajonale. Ajo do të përpiqet gjithashtu të mbrojë kroatët në Serbi, por gjithashtu të kontrollojë procesin e anëtarësimit të Serbisë në Bashkimin Evropian,” parashikoi Pupovac.
Komenti i Grabar Kitaroviçit se ajo do të punojë për të fituar një status më të mirë për kroatët “te vendet fqinje”, duke përfshirë Vojvodinën dhe Serbinë, shkaktoi kritika në Serbi se gjoja u la të kuptohej se provinca veriore e Vojvodinës ishte një vend imë vete.
“Kjo ishte një shkarje goje, e cila në vendet e tjera nuk do të ishte e mundur. Është një lapsus që nuk do të ishte gjithashtu i mundur në partitë e tjrea, por në HDZ-në po,” shtoi Pupovac.
Fushata e Grabar Kitaroviçit theksoi orientimin e Kroacisë drejt Evropës Perëndimore dhe ShBA-ve, duke e përmendur shumë pak Ballkanin perëndimor.
Ajo tha se Josipoviçi e kishte marrë shumë të butë një qasje ndaj Serbisë, duke paralajmëruar se ajo do të kushtëzojë përparimin e Serbisë në rrugën e saj drejt BE-së për të marrë më shumë informacione mbi personat e zhdukur gjatë konfliktit të viteve 1990.
Josipoviç tha se ai do të këmbëngulë vetëm që Serbia të kalojë në të njëjtin proces anëtarësimi në BE që kaloi edhe Kroacia.
Në fillim të mandatit të tij presidencial, Josipoviç punoi shumë për përmirësimin e marrëdhënieve rajonale me Serbinë dhe Bosnjën.
Ai u takua me presidentin serb Boris Tadiç në qytetin lindor të Vukovarit në vitin 2010, kur Tadiçi vizitoi varrin masiv në Ovcara dhe kërkoi ndjesë për krimet e kryera atje nga paraushtarakët serbë dhe Ushtria Jugosllave, kur ata pushtuan qytetin në vitin 1991.
Vukovari, i cili duroi shkatërrime masive dhe viktima njerëzore gjatë një rrethimi që zgjati 84 ditë nga Ushtria Jugosllave dhe paraushtarakët serbë, ka një vend të veçantë në kujtesën e kroatëve.
