Regjisori Emir Kusturica, i njohur për filmat dhe qëndrimet e tij nacionaliste, i është bashkuar me anë të një artikulli në një gazetë të përditshme sulmeve të qeverisë Serbe kundër Rrjetit Ballkanik të Gazetarisë Investigative, BIRN.
BIRN është vendosur në javët e fundit në qendër të një fushate sulmesh nga qeveria dhe shtypi Serb, pas publikimit të një investigimi që hidhte dyshime mbi tenderin për tharjen e minierave serbe të përmbytura.
Sulmet gjatë javës së fundit janë pjesë e një fushate njëvjeçare në media kundër BIRN, e cila ka kulmuar javët e fundit pasi kryeministri serb Aleksandër Vuçiç, deklaroi që gazetarët e BIRN po tentojnë të nëpërkëmbin qeverinë e tij me ndihmën e Bashkimit Europian.
Në një artikull të publikuar në mediat Serbe, Kusturica, e cili duket qartë që nuk e ka lexuar investigimin, e cilëson BIRN si një organizatë “neo-kolonialiste”
Kusturica është një regjisor i njohur ndërkombëtarisht, por idetë e tij shoviniste dhe nacionaliste nuk janë aq shumë të njohura jashtë Serbisë.
Si regjisor ai ka bashkëpunuar me aktorë si Jonny Depp, Faye Dunaway, dhe këngëtarë si Iggi Pop apo Jerry Lewis, duke fituar çmime dhe vlerësime ndërkombëtare, por ai shpesh e përdor popullaritetin e tij në mbështetje të nacionalizmit ekstrem në Serbi.
Edhe pse Kusturica është biri dy prindërve myslimanë Boshnjakë nga Sarajeva, Kusturica është pagëzuar në 2005 në Kishën Ortodokse Serbe, dhe pretendon se rrënjët e tij të hershme janë Serbe.
Ai u largua nga Sarajeva në vitin 1992 për tu shpërngulur në Beograd. Në një protestë të ultra-nacionalistëve Serb kundër pavarësisë së Kosovës në shkurt 2008, ai cilësoi ata Serbë që nuk ndajnë pikëpamjet e tij politike që Kosova është pjesë e Serbisë si “minj.”
“Ku janë ata minjtë vendas që na tregojnë gënjeshtra në shkëmbim të parave dhe na thonë që ne jemi askush,” i tha Kusturica turmës. “Ku janë ata sot? Në gropat e tyre të minjve? Ku janë ata njerëz që besojnë që miti Serb i Kosovës është një mit Hollivudi?”
Të elektrifikuar nga fjalimi turma e ultranacionalistëve bërtiste “Emire, Srbine” (Emir Serbi).
Kusturica njihet dhe si mbështetës i ish-presidentit Serb, Sllobdoan Millosheviç, të cilin e konsideron hero dhe i liderit Serb të Bosnjes, Radovan Karaxhixh, i cili po gjykohet në Hagë për masakrën e Srebrenicës.
Kur nuk drejton filma ose flet në tubime nacionaliste, Kusturica luan në një bandë muzikore,që ka një këngë dedikuar për të akuzuarin për krime lufte dhe gjenocid, Karaxhixh.
